Blogger: Imeq pingaaraluaqaaq

Suna tamaat qinerlugu periarfissanik ujaasivunga suut ineriartortinneqarsinnaasut suullu atorluarneqarsinnaasut paasiniarlugit. Kalaallit Nunaanni suut pisuussutigaavut.

Ilaatigut imeq eqqarsaatigisarpara. ”Uagut imerput”. Aamma ilaatigut tupigusuutigilaartarpara sooq ”938 Greenland Spring Water””cash-cow-imik” aningaasarsiorniarluni tuniniarneqalersimagunannginnera. Nunarsuarmi inuiassuit periarfississanngilagut imermik mamarluartumik ussiinissaannut? Periarfissaqanngivikkami Kalaallit Nunaannit oqariartuutitsinnik nunarsuup sinneranut siammarterinissaq?

Tulliuttumi ”939” innersuutigisassavara kisianni imeq nunatsinneersoq eqqarsaatigalugu.

Taamak oqareerlunga aappaatigut paasisinnaa paasisinnaavara nukippassuarnimmi - tuniniaavimmi pioreersumi saqqummerniarneq atuiffiusussaammat. Assersuutigalugu ”938”Evianimut unammillerniartussaassaaq, taanna imernik tuniniaasut annersarisaat – nioqqutissiornermi pisoqaq qularnanngitsumik pisisartunik aalajaatsunik peqalereersimasoq. ”938” periarfissaqarnerpa?

Oqarusukkaluarpunga ’soorunami’apeqqutaaginnarporli qanoq? ”938” tunisassiaavoq patajaatsoq nunarsuarmi minguinnerpaatut nittarsaanneqarsinnaasoq. ”938” immini nittarsaappoq. Nittarsaassineq immikkoortualunnut marlunnut avinneqarsinnaavoq, paasissutissiisoq uppertitsiniaasorlu. Paasissutissiinermi tunisassiamik nutaamik ilisarititsineq atorneqakkajuppoq, taamaattunik allanik tunisassiaqartoqarsimatillugu. Ass. nakorsaatini. Nittarsaassinermi amerlanerpaamik uppertitsiniaaneq atorneqartarpoq amerlanertigut pisisartut pisariaqartitsinerat pilersinniarneqartarluni. ”938”pitsaaqqutigaa immini ussassaarigami. Aamma ajoqqutaanavianngilaq ”938”suminngaanneernera ersersinneqarpat, pinngortitarsuaq najugaqarfitsinniittoq pinneqimmat – taanna sinaakkutissatut iluanaarutaassaaq. Nunarsuarmi inuiassuit ullutsinni nioqqutissat akuutissalersugaanngitsut soqutigaat. ”938” suli økologiskiunerulersinnaava?

Evian-imik tunisassiortorsuaq Danone, 2013-ip ingerlanerani tunuartilaartussaavoq 2014-imut nukissarsiorniarluni. Tamassuma ersersikkunarpaa piffissaq tuniniaanermut pitsaavallaanngitsoq. Immaqaluunniit maannakkut periarfissanngoraluarpoq ”938” saqqummersissallugu unammillertaata sangujoqusaarnera iluatsillugu(?). Greenland Spring Water siunnerfilimmik pilersaarusiorsimava?

Eqqarsaatima allat ilagaat: ”938-mut” qanoq sunniuteqassava/sanngila, assersuutigalugu - inummik saqqumilaartumik ilisarisimasaqartumillu taasigaanni – Caroline Wosniacki tennisimik unamminermi nalaani ”938-mik” imertartuuppat? Nunarsuup kissatsikkiartorneranik oqallinneq pikkunarnerpaaffissaminiimmat Kalaallit Nunaat eqqartorneqarpoq. Taamani ”938-mik” saqqumilaartitsinissamut periarfissaq atorsimassagaluarparput. Imaassinnaavoq ”938-p” tunuliaqutaa piareersimasimanngitsoq immaqaluunniit. Ineriartoqqinnissamut periarfissatsiarsuugaluaq.

Ineriartornissamut siunnersuutit ilagisinnaavaa ”938” assersuutigalugu hotelinut nioqquteqartalersinneqarsinnaanera. Immaqa Hilton angivallaatsialaaraluarpoq taamaakkaluartoq Hilton eqqarsaatersuutigiinnassavarput. Isumassarsiaq tuniniarneqarsinnaappat ”938” Hiltonimik hotelerpassuarnut imermik tuniniaasinnaanngortinnissaa siunnerfittut ajunngilluinnartutut nalilersinnaavarput. Ussassaarineq imaannanngitsuusussaq allaanerusinnaassaaq. Taanna Hilton suleqatigalugu ingerlanneqarsinnaavoq. Aamma Hiltonimit soqutigineqassagaluarpoq nunarsuarmi erngit minguinnersaasa ilaat minguinnersaajunngikkuni tuniniarnissaanik tanngassimaarutissaqartuuppat. Paarlattuanik Hiltonip hoteliutaasa 2.800-it sumiiffinni assigiinngitsuniittuni ”938” nassaassaassagaluarluni.

Naliliisinnaanera naapertorlugu siunnersuutigerusuppara ”938” kusassarneqarnerulaassasoq. Isumaqarpunga puua kusanaallunilu tigummiuminaatsoq. Puua isumaqartupilussuummat puigussanngilarput. Naak oqareeraluarlunga ”938” immini ussassaarisoq taamaakkaluartoq isumaqarpunga puua allamik taarseraluaruni ajornavianngitsoq.

”938” siornatigut imaattunik qulequtsiussaqartarput: ”Imeq – kuultinnassutaanngilaq”.

Franskilli sianiivissortuusinnaanngillat imeq milliardilikkuutaanik kaaviiaartitsissutigisinnaagunikku. Periarfissatsialassuit qatangiinnartinneqarsimappata imaanngilaq uniinnassasugut. Paarlattuanik eqqarsartariaqarpugut: Sunaana pitsaanerusumik suliarinngikkipput suullu aaqqitassaraavut? Naalakkatta nunarsuaq pinngortikkamiuk Kalaallit Nunaat arlalinnik immikkut pilluaatississimavaa. Taassuma pilluaatissiissutaanik atorluaanerunissamut akissaqannginnatta? Inerneraa aningaasarsiorfiunngitsumit qanoq aningaasarsiorlualersinnaavugut?

- Uagut Kalaallit Nunaanni aalajangersimavugut imernik eqqussuisalerniarluta. Tupinnaraluaqaaq. Assigiinnarpaa Saharami sioqqanik eqqussuiniarpata.