Nipilersoqatigiit Nanook cd-liaat pissaaneqaqisut, saqqummersimalereerpoq. Nipilersukkat taakkulu aaqqissuussaannerat pissanganartuupput, nunatsinnilu nipilersukkanit allanit allaanerungaatsiarlutik – Nanook ilisarnarluartumik nipaat
Nipilersukkat nipaallu
Nipilersukkat nipaat immiussisarfimmi torralataalluinnartumik suliaasimavoq, erinnat qaleriissaakkatut qammarlugillusooq ikkussuunneqarsimallutik – qaleriiaakkat, rytmimit nipilersoriaatsimillu allaamiit allamut ikaarsaartartut – ataqatigiinnerinut ajoqusiinngitsumik. Nipilersoriaaseq postrock, pop, indierockiuneranut ilisarnaatilik. Indierock – nipilersoriaatsip pop-rockip ilaaniikkaluarpoq, imminulli pigisutut oqaatigineqartarluni, tamat tusaqqoornarisaannik aliikkutassiassarpassuarnut illuatugiliuttutut taaneqartarluni. Oqaatigisariaqarporlu Nanook-kut ”pissaaneqaqisut”-liaat akikitsumik tusaqqoornartulianut illuatugiliulluartuusoq. Taamaakkaluartoq ”pissaaneqaqisut” suliaavoq pitsavissuaq. Taamaattumik pisariaqarpoq uneqqissaarluni, allanik sammisaqarani, nipilersukkat tusarnaarluarnissaat, erinnarsoriaatsit allanngorarnerinik, nipilersuutit atorneqarnerinik aamma erinnnat tamalikaartumik katiterneqarsimanerannik tupaallatsinneqartarluni tusarnaassalluni. Nipilersoqatigiit tunniussimallutik nipilersuutivinnik (qarasaasiamiinngitsunik) atuisimapput, nipilersuutit nipaat eqqortoq tulluartorlu pijumallugit, Tamanna sunniuteqarluarsimavoq. Soorlu tusaaneqarsinnaasorlusooq erinniortut nipilersortullu ilungersorlutik sulisimanerat, nipip kissaatigisamik pilersinneqarnissaa anguniarlugu.
Taallat, erinarsornera nipilersortullu
Taallaasa imaraat pilluarluni assanninnermiit aliasorujussuarnermut, suut tamarmik ajutuulerneranniit inuunerup nuannersuisa misiginissaannut, minnerunngitsumillu kalaalliussutsip tulluusimaarutiginera, kiisalu piniartut pinngortitamut tunniusimalluarnerannut, pissaaneqassusiannillu ataqqinninnermut. Aamma ilaqarput siulit pingaartitaannik nuannersumik eqqaamasaqarnissamik oqariartortunik, pinngortitallu uumasullu inuiaqatigiinnut nukissamik tunisisarnerannik. Atuagaaqqiannguami kusanartumi tamakku allassimapput, ajoqutaa tassa kisimi naqinneri mikeqimmata atuaruminaannera. Pissaaneqaqisuni , angajoriit Frederik aamma Christian Elsnerikkut erinarsortuupput, erinnamik qataattumut nooriataartarnerannik ilisarnaateqarnermikkut erinarsoriaatsiminnik pissanganarsaarisartunik. Nukariit Elsnerikkut saniasigut nipilersoqataapput Mads Røn, Andreas Otte aamma Kim Heilmann, kiisalu allanik trombonemik, trompetimik, saxofonimik agissamik kayboardimillu nipilersortunik immiusseqateqarsimallutik.
Ataatsimut isigalugu Nanook-kut Pissaaneqaqisuliaat nipilersortartutut suliaavoq pitsassuaq, naak sakkortuunik taallartaqaraluarluni, misileraanertalinnillu erinartaqarluarluni, ilumini eqqissisimanermik pissaanermillu pigisaqartoq. Nipi pitsassuaq, aaqqissorneqarnermigullu nutaaliortoq. Ullorissanit 6-nit Nanook-kut Pissaaneqaqisoq tallimanik pissaaq.