Skip to main content

Tallimanngorneq 17 juni isiginnaartitsisartut sisamat, Anne Marie Ottosen, Kimmernaq Kjeldsen, Connie Kristoffersen og Najattaajaq Joelsen, ukiuni marlunni illinniareerlutik naammassipput. Naammassinerminni isiginnaagassiaat Arnatsialaat (tuluttut ”Riz Sisters”) indianermit Tomson Highway-mit allataavoq, ilitsersuisuuvorlu Canadimiu Patti Shaughnessy.

Isiginnaartitsisartunngorniarfiup ningiua, Makka Kleist, peqatigalugu naammassisut namminneq isiginnaagassiaq kalaallisuunngortissimavaat.

Mamarliinerit ningarnerit allatullu inuuneqarnissamik sinnattuarisat
Isiginnaagassiami takutinneqarput arnat 7-it nunaqarfimmiut. Inuuneranni pisartut annersaraat sapaatip akunnikkaartumik bingortarneq eqquinissarsuarmillu neriuuteqarneq. Inuuneq pisarnertut ingerlarusaarpoq, bingo, mamarliinerit, erngunnerit, kamaattarnerit aqqutigalugit, arnap sorliup nunaqarfimmi angutinik XL-inik kanuuna atortulinnik atoqateqarsimanerannik eqqartuisarnerit, kiisalu sinnganerit, ningartarnerillu eqqartorneqartuarlutik.

Arnat tamarmik immikkut pissuseqarlutik ilisarnaateqarput. Silatusaartartoq siuttuujumatooq Pilaavia, Maria Louise pualasooq, anartarfiliarnissamik nuannarisalik, meeqqanik ikiuijumatooq Sikallutta, Atangana sakkortuumik pissusilersortartoq, oqallortooq oqitsumik inuunilik Aani Qapuk.

Aamma ilaqarput arnamik kraftertumik, kiisalu niviarsiamik qaratsamigut nappaatilimmik Nannapuu-mik. Taanna meeraalluni angutinik atornerlunneqartarsimavoq, qerneriaammillu kinguaassiutimigut naalliutsinneqartarsimalluni. Angutitatuaraat najaasaartoq, Nannapuulli anersaatut ikinngutigisaa, aammali taanna Mr. Bingo Masteriusaarpoq.

Arnat tamarmik inuunermik allamik neriuuteqarlutillu takorluugaqarput. Tamannali aatsaat piviusunngorsinnaavoq bingorlutik ajugaagunik. Periarfissarseriataarput Nuummi bingornissaarsuaqartussanngormat ½ mio. kr. eqqugassartalimmik. Katerseriarlutik Nuulliarlutik nammineerlutik aallarput. Ingerlaarnerminnilu inuunerminni aliasuutitit nuannaarutitillu saqqummiussorpaat. Eqquinngitsoorput. Angerlarnerannilu toqup timmiaata arnaq kraftertoq aavaa.   

Misigissutsit tamaasa attorlugit
Nunaqarfinnguami arnat inuuneranni oqimaatsut artornartullu oqaluttuarineqarput takutinneqarlutillu oqitsumik assullu quianartumik, isiginnaarianik tiguaalluartumik, inuttaritinneqartut ilisarnarluarmata, oqaasertaliussallu tissinaqimmata akunnattoorfeqaratillu.

Isiginnaagassiarli 2 tiiminik sivisussusilik oqalunneq atornerullugu takutitassiaavoq, isiginnaartitsisut ataasiakkaat kisimiittarlutik oqaluttuartinneqartarlutik.

Tassa timi atornerullugu ilusilersuutit takutitissutillu atorneqarnerunatik. Isiginnaagassiaq soraarummeerutaammat kiissaatiginarsinnaagaluarpoq isiginnaartitsisunngorlaat annerusumik inissaqartinneqarsimanissaat timertillu atorlugu ’oqaluttuanik’ takutitsinissamut ilinniarsimasaminnik takutitsinerutillugit.

'Nammineerlutik ilinniarsimasuttaaq' (Maalia, Ujarneq) isiginnaartitsilluaqaat. Pingaartumik Maalia arnatut sakkortuutut erinarsullaqqittutullu takutitsilluarpoq. Isiginnaartitsisartutoqqat Makka aamma Majbritt peqataalluaqaat, minnerunngitsumik Majbrittip arnartarfittaarusunnersua assut nuannarineqarluni. Isiginnaartitsiviup ilusilersornera, nunarfinnimmi illut ilisarnartut (Camilla Nielsen aamma Lars Rosing sanaavi), nipilersornertaalu (Leif S Immanuelsen supputaasagai), qullilersorneralu ( Naleraq Eugenius) ajunngivipput.

Ataatsimut isigalugu isiginnaagassiaq inuunerup nuannersuinik artornartuinillu oqaluttuaavoq tissinarluinnartumik takutitaq. Arfininillit Sermitsianit tallimat Arnatsialaat tunerusuppakka, isiginnaartitsisartunngorlaallu pilluaqqullugit.    

Greenlandic