Skip to main content

KNR pillugu nalilersuinerma aappaanni meeqqat innarluutillillu sammissavakka. Isumaga malillugu meeqqanut innarluutilinnullu radiukkut tv-kullu allaakaatinneqartartut  oqallisigissallugit soqutigineqarpiartanngillat, naak meeqqat, inuusuttut innarluutillillu atugarisaasa pitsaanerulersinnissaat politikkikkut anguniarneqaraluartut.

Innarluutillit KNR-ip sumiginnarpai
Innarluutilinnut KNR-ip aallakaatitassiarisartagai nalilersussallugit ajornanngitsuararsuuvoq, tassami soqanngilaq. Taamaallaat DR-ip aallakaatitassiarisartagai, Danmarkimi pissutsinut tunngasut, TV-kut takutinneqartarput, kalaalisut oqaluttortalernagit, oqaasertalersornagit, allatulluunniit nassuiaasersornagit.

Matumani KNR-ip aallakaatitsisarnermut pisortai, Naalakkersuisut aamma Inatsisartut sumiginnaapput. Sumiginnaaneq uanippoq innarluuteqartunut assigiinngitsunut tulluarsakkanik aallakaatitassiortarnissaminut KNR pilersaaruteqanngimmat, pisortallu sumiginnaanerat tassaalluni  aningaasaliisanngimmata innarluutilinnut aallakaatassiornermut atorneqartussanik.

Radioqarnermut TV-qarnermullu Inatsartut inatsisaanni siunertat pappiaqqakkut kusanaraluaqaat. Taakkuli piviusunngortinnissaannut qanoq iliuuseqartoqanngilaq. Pissutsit taamaannerat kanngunartuliornerulaanngitsuunngilaq arajutsisaq.

Innuttaasutut allatulli innarluutillit pisinnaatitaaffigaat piumasarisinnaallugulu inuiaqatigiinnut tunngasunik paasitinneqartarnissartik imminnut naleqqussakkanik, pisinnaatitaaffigaallu ’innuttaasunik sullissivimmit’ akuutinneqarlutik peqataatinneqarnissartik. Sumiginnaanermikkut KNR-ip nunatsinnilu politikkerit FN-p innarluutilinnut isumaqatigiissutaa, nunatsinnuttaaq atuuttoq, unioqqutippaat.    

Meeqqanut aallakaatitseriaaseq allanngujuitsoq
Ulluinnarni sapaatinilu meeqqanut aallakaatitseriaaseq, aamma arfininngornikkut ’aluu aluu’, kinguaariinni marlunngulersuni allanngortinneqarnikuunngillat. Aallakaatinneqartuni atuffassisoqalaartarpoq, meeqqat erinarsuutaannik nipilersortoqartarluni, meeqqerivimmulluunniit pulaarluni meeqqamik apersuisoqartarpoq.

’Mikrofonip alapernaatsup’ periusaa atorlugu inersimasutut meeraq apersorneqartarpoq sapinngisannguaminik akisassaanik.

Arfininngornermi ’aluu aluu’ tassaavoq ’inuugujoq’ meeqqanut sammititaq. Ilaanna pasitsannartarpoq meeqqanut aallakaatitassiat angajoqqaanut aanaakkunnullu sammitinneqarnerusartut, meeqqanuunngitsoq.

Meeqqat ernuttallu radiukkut oqaluttut tusaassallugit inersimasut nuannarisaqaat. Meeqqap 4-6 ukiullip meeqqerivimmi susoqartarneranik apersorneqartarneri meeqqat allat qanoq pissarsissutigisarneraat eqqororiaruminaatsippara.

Aallakaatitassiortarnerit meeqqatut eqqarsarluni meeqqat paasilluarsinnaasaat tunngavigilliuarlugit suliarineqanngisaannarput, inersimasutulli eqqarsarluni meeqqanut suliarineqartarlutik. Meeqqanut aallakaatitassiortarnertaaq ’namminneq kajumissutsiminnik’ tamakkulerisartunut isumagitinneqartarpoq, meeqqat paasisinnaasaannik eeqarsarluni akuutinneqarnissaannut immikkut ilinniarsimanngitsunut. Kajumissutsiminnik aallakaatassiortartut KNR-miunit ilitsersorneqarneq ajorpasipput.

Tassanissaaq KNR politikkerillu sumiginnaapput. Takorluukkat inatsimmiikkaluarput, piviusunngortinnissaannullu aningaasaliisoqartarani. Aallakaatitassiortarnissamut isumaqatigiissummut naleqqiullugu KNR-ip aamma naalakkersuisoqarfiup akisussaasup naammagiinnartarpasippaat minutsit aallakaatitsivissat ulikkaarneqarpata, aallakaatitat imaat pitsaassusaallu apequtaatinnagit.

Meeqqanut aallakaatitassiortarnerminittaaq KNR- radiop meeqqat kalaallisut paasisinnaanngitsut sumiginnartarpai, aallakaatitassiat kalaallisuuinnaasarmata. Illuatungaanilu KNR-TV meeqqat qallunaatut paasisinnaanngitsut sumiginnartarpai,

DR-p aaallakaatitassiai qallunaatuut takutittaramigit. Taakkua meeqqanik akuutitsillutillu meeqqat silarsuaat aallaavigisaraluarpaat, nunatsinnulli sammisuunatik Danmarkimut sammisuupput. Qanga kingullermik TV-kut meeqqanut nutaamik aallakaatitassiortoqarsimanersoq naluara.

Meeqqat inersimasullu kalaallisut paasisinnaanngitsut assigiinngitsumittaaq pineqarput. Inersimasut kalaallisut qallunaatullu nutaarsiassanik pilersorneqarput, meeqqalli radiukkut kalaallisuinnaq, TV-kullu qallunaatuinnaq, aallakaateqqeqqitat eqqaassanngikkaanni..

Meeqqat inuusuttuaqqallu pitsanngorsaavigineqarnissaasa politikkikkut sammineqaruttulerfianni KNR-ip meeqqanut immikkoortortaqarfia akisussaasunit soqutigineqarpiarani sarfarsiataartiinnarneqarpasippoq, meeqqalluunniit illersuisuanit ambassadøriannilluunniit uparuarneqannguassanani. Tamanna pissussissamisuungilaq.

Meeqqanut innarluutilinnullu aallakaatitseriaaseq pilersaarusiukkamik nutarterneqartariaqarpoq.   

Greenlandic