Katuma: Allanngulerpugut *** (NKCD001)

Nipilersoqatigiit Katuma-p cd-liaqqaava ”allanngulerpugut” tusaannarlugu pimoorussilluarluni suliarisaasoq tusaaneqarsinnaavoq. Aamma pimoorussinerat cd-ip saqqaani nipilersoqatigiillu kiinaasa qalipanneqarneranni, MansiArtimut suliaritinneqarsimasumi, takuneqarsinnaavoq. Nipaata immiunnera NK Studio-mi suliarineqarsimalluni, nipilersoqatigiinnit namminernit. Katumami nipilersoqatigiit sisamaasut, Ludvig Andersen Lyberth, Karma Brandt, Nukannguaq Kajussen aamma Kristian Otto Therkildsen, ajorpianngivissumik cd-liorsimapput. Erinnat taallallu Ludvig Andersen Lyberthip suliarisimavai, poprockijunerusut ”oqinnerusut- qitumaartut”, nipilersoqatigiinnit ajunngivissumik nipilersorneqartut. Taallaat asanninnilersaarutaanerupput, aammali takorluukkanik aappariinnermilu neriuutinik aserortunik imaqarlutik, ulluinnarni eqqartorneqarpallaartanngitsunik, soorlu erinarsuummi ”qivittumi” tamakku sammineqartutut. Erinaq aallarniutaasoq ”marluulluta” Katumakkut videoliaralugu Facebookikkut allatigullu saqqummersereerpaat, nuannarineqalereerporlu. Taavalu erinarsortuata Ludvig Andernsen Lyberthip erinaa. Ilaasa torraanerassaqaat, allalli isumaqassangunarlutik naliginnaavallaartoq, erinnallu ilaannik kivitsisinnaarpianngitsoq. Uanga isummat takku marluk qeqqanni inissisimavunga. Erinnat ilaannut tulluartorujussuarmik erinarsorpoq, ilaannulli naammaannarpallaalersarluni. Kisiannili arlaatigut pissanganartumik peqarpaluppoq, soorlu danskimut erinarsullaqqissorsuarmut C.V. Jørgensenimut inuusunnerungallarmat erinaanut eqqaanangajattumik nipeqarpalussinnaasarluni. Taamaattumik Ludvigip erinaa sungiutigiinnagassaassaaq, periarfissinneqaruni pissanganartumik ineriartorluarsinnaasoq. CD ataatsimut isigalugu uannut erinnat nipilersornerillu aaqqissuunneri assigiiaarpallaalaarput, nipilersorluaraluaqaat, sakkortusiartortitsinerli allanngorartitsinerlu maqaasinarput. Naak cd-ip aqqani allanngulerneq oqariartuutaagaluartoq, nipilersoriaaseq kalaallit beatpop-imik nipilersoriaasitoqaat ilisarnarluarpoq, asanninnilersaarutinut qanilleriasaartartoq. Manis Rasmussen, MansiArt, saqqaanik atuagaaqqamillu suliarinnippoq, siammarternerilu isumagalugit. Nipilersoqatigiit Katuma cd-liartik namminneq akilersorpaat, Koda-millu tapiiffigitillutit. “Suliassanik taamatut agguataarineq iluarpoq, tassa niuernermut tunngasortai allap suliaralugit, uagullu nipilersornermi pilersitsineq immiussinerlu kisiisa isumagisinnaallugit. Siunertarinikuuvarput cd ”made in Greenland-iussasoq”, naak cd-ertai Polenimi naqiterneqaraluartut”, Nukannguaq Kajussen, NK Studio-mik piginnittoq, oqaluttuarpoq. Katuma ”allanngulerpugut”-mut ullorissanit arfinilinnit pingasut tunniutissavakka.