Torrassuaqaratillu tusaqqoornartoqanngillat – nutaaliorsinnaasut maqaasinarput
Aasaq manna nipilersornikkut nutaarsiassaq nuanniitsoq tassa Atlantic Music-ip immiussisarfini Københavnimiittoq matusigaa. Immiussisarfituaq nunatsinni nipilersornermut attuumassutilik proffimik ingerlasoq. Immiussisarfiup ammatittuarnissaa akilersinnaajunnaarsimavoq Cd-nik tuniniaaneq apparaluttuinnarmat. Taamaakkaluartorli saqqummersitsisarneq ingerlajuarsinnarpoq, ilaat tapiiffigineqarujussuartarlutik allallu namminneq akilersukkaminnik saqqummersitsisarlutik. Inernerilu naammannapajaarput.

Pereersimasut nuannaartorineqarput
Qanga nuutinik saqqummersitsisartorsuusimasup ULO-p kalaallit erinarsuutitoqaannik taasani ”traditionel Greenlandic Music”, cd-it tallimassaat, saqqummersippaa, ilisimatuut allallu  1900-ikkut aallartilaarneranni immiuttarsimasaannik imaqartoq. Taamaasilluni immiussisitsisartup Karsten Sommerip takorluukkani piviusunngortippaa kalaallit niperujoorutaannik katersanik 1906-imit 1989-mut saqqummersitsigami. Sommerip oqaluttuarinikuuvaa cd-it saqqummersinnerannut præsident Obama sunniuteqarsimasoq. CD-it tallimat ataatsikkoortillugit saqqummerserusussimangaluarpai, aningaasanilli tapiissutissanik amikkittoorujussuarluni. Taamaatsiinnaleraluarluni Sommer sinnattorsimavoq Obamap ornikkaani oqarfigalunilu: ”ataasiakkaarlugit saqqummersiinnakkit”. Taamatullu iliorsimavoq. Obamap sinnattukkut siunnersuuteqarneratigut aamma Namminersorlutik oqartussanit, NAPA-mit, Dansk-Grønlandsk kulturfondimit, Dansk folkemindesamlingimit, KNR-imit kiisalu Kommuneqarfik Sermersuumit aningaasarpassuarnik tapifffigineqarnermigut, Sommerip takorluukki piviusunngorteratannguarpai. Erinarsuutitoqqat saqqummersititat nipilersoriaatsimut nutaanerusunillu nipilersugassiortartunut sunniuteqarsimanersut nalilersoruminaapput. Sunniuteqarsimassappulli, soorluli assiliisartup Jette Bangip assilisaasa saqqummerseqqinneqarneri, titartaasartullu Nuka Godtfredsenip titartartagi ”alloriarneq siulleq” tulliilu, nipilersortartunut eqqumiitsuliortunullu inuusunnerusunut sunniuteqarsimassasut. Saqqummersitalli tamakku kusanaraluaqalutik nersortariaqaraluaqalutillu alutornartiginermissulli  itsarnisarpalaartunik nuannaartorinnitsitsisuullutik, pissutsinik allanngutsaaliueqataallutik, nutaaliorusussutsimut tunuarsimaartitsisuupput, kiisalu pisortat aningaasaaterpassuinik imminnut pituttuisarlutik. Taamaattumik aperisariaqarpoq kulturministerip aamma saqqummersitsisartut namminersortut nipilersornikkut, eqqumiitsuliornikkut kulturikkullu nutaaliorluni ineriartortitsinissamut pilersaarutaat sumiinnersut, nutaaliornikkuinnarmi cd-nik, atuakkanik allanillu nutarpasinnerusunik pisisarnerup apparaluttuinnarnera pakkersimaarneqarsinnaammat.

Nutaaliornissamut periusissaq amigaataavoq
Saqqummersitsisarnermut nutaaleriorsinnaanermullu periusissiap amigaataanerata nalitsinni nipilersukkat pitsaassusaat appariartippaattaaq. Saqqummersitsisartut, nipilersortartut eqqumiitsuliortullu saqqummersitap imarisamigut teknikkikkullu pitsaassusissaat qulakkeerniartussaavaat. Politikkerillu suliassaraat atugassaritinneqartut sinaakkutissaasa pitsaanerpaaffimmiinniissaat. 

Pikkorissorpassuaqaraluarpormi, erinarsuusiortartut nipilersortartullu inuusunnerit utoqqaanerillu akornanni. Aasaq manna cd-it saqqummersut tamatumunnga assersuutissaalluarput, Maritha ”inequnarami”, Sussat ”pinniissalikaartunnguugaluarlutit”, Asuki ”tikitat” aamma Abel & Najaaraq Kai Olsenilu ”naasorissup kuup sinaani”. Saqqummersitat  ajunngikkaluarpummi, nuannarinnitsiminnut sammigamik. Pitsaassusialli assigiinngissitaartorujussuuvoq, ataatsimut isigalugit sukkuaqqanik akuleriinnik issortitalianut eqqaanarnerullutik. Arlaannaalluunniit torrassuartaqanngilaq tusaqqoornartortaqaranilu. Innuttaasunik sullissiviup KNR-ip nipilersukkanik saqqummertunik nutaanik soqutigisaqanngilluinnarnera, qanganitsanillu nuannarisaqarnerujussua, peqqutaaqataasimasinnavoq. CD-nik saqqummersisarnermi ileqquulersimavoq erinarsuusiortut tassaasarlutik nipilersuutigalutik immiussisartut, aamma immiussinermi imminnut aqutsisut. Immiussinermi immikkut immiussisitsisumik aquttoqaqqittoqartaleraluarpat nalitsinni nipilersukkat pitsaassusaannik kivitseqataassaqqajaqaaq. Nipilersortartut kattuffiat aamma EPI  nipilersortarnermi eqqumiitsuliornermi kulturikkullu nutaaliorusussutsimut nutaanngorsaanermullu eqqanaraluartumik sunniuteqanngivipputtaaq. Taamaattumiguna  cd-nik tunisaqartarneq apparaluttuinnarunartoq. Pikkorissorpassuit pikititsijusarlutik nutaanngortitsisinnaasut ujartornarput.