Blinkenimik ataatsimeeqateqarneq: Sila sillimaniarnerlu oqaluuserineqarput

USA Danmarkilu, Amerikamiut nunanut allanut ministerianik tikeraartoqartoq, assigiinnik soqutigisarpassuaqarput.

USA-mi nunanut allanut ministeri Antony Blinken, ataasinngormat ullup-qeqqata siorna ministeriunerup najugaqarfia Marienborg qimappaa, ministeriuneq Mette Frederiksen (S) pulaareerlugu.

Biilit qernertut qulinit amerlanerusut politiillu motorsikkilertut ingerlaaqatigalugit Københavnimi Amalienborgimut dronning Margrethe kunngissarlu Frederik naapikkiartorpai.

Ministeriunerup oqaatigaa taassuma pulaarnerani aalajagersimasunik isumaqatigiissuteqartoqarsimanngitsoq.

- Pingaarnerusunik oqaloqatigiissuteqarneruneruvoq, Blinkenillu naalagaaffeqatigiinnut ullumi pulaarnera nunatut mikisunnguatut nuannaarutissaavoq. Aamma aalajangersimasunik aalajangiissuteqartoqanngilaq, Mette Frederiksen pulaartoqareersoq oqarpoq.

Dronning Margrethe kunngissarlu Frederik Amalienborgimi Anthony Blinkenimik tikilluaqqusisut

Taakku marluullutik Irakimi Afghanistanimilu kiisalu Issittumi sillimaniarnermut politikki oqaluuserisimavaat. Aamma akiuussutissat, Ruslandimut Kinamullu tunngassuteqartut kiisalu sila Danmarkip nunani tamalaani tusaamassutigisaa oqaluuserisimavaat.

- Atorneqarsinnaasulli tigussaasut Danmarkip tunniussinnaasai aamma oqaluuserineqarput. Danmarkimi aaqqiissuteqarsimavugut USA-mi minguinnerusumik ingerlatsiniarnermi atorneqarsinnaasunik, ministeriuneq oqarpoq.

Amerikamiut nunanut allanut ministererisimasaata Mike Pompeop ukiut marluk matuma siornatigut Danmarkimut tikeraarami dronningi naapissimanngilaa.

Præsidentiusimasup Donald Trumpip Kalaallit Nunaat 2019-imi pisiarerusussimavaa. Tamatuma kinguneranik Danmarkip USA-llu akornanni isumaqatigiikkunnaartoqarpoq.

Præsidentissamik qinersisoqareersoq allatut suleriaaseqarneq

Ministeriunerup oqaatigaa, USA-mi qinersisoqareersoq aqutsisut nutaat allatut suleriaaseqartut.

- Oqaatigerusuppara allatut suleriaaseqartoqalersimasoq. Tassa Issittoq pillugu suleqatigiissuseqartoqarusulerpoq. Silap pissusaanut sillimaniarnermullu politikkinut atatillugit allanngortoqarsimavoq.

- USA pingaarnertut iligaarput Europamullu qaninnerpaalluni, taamaammat allat pinnatik, uagulli aalajangiissuteqartarnissaput soqutigisaraarput, Mette Frederiksen oqarpoq.

Powered by Labrador CMS