Teologi neriumajunnaartoq
Biskoppip allaffia: Ingerlatseriaatsit malinneqartarput
Tamanut Kujataanimi sapaatip akunnerani uani saqqummersumi biskoppip allaffianit ilisimatitsissutigineqarpoq Portu Qisummut suliassami ippinnartoqarsimanngitsoq
Portu Qisuk sapaammi neriumajunnaaqqilerpoq, nunami maani palasitut atorfinnut qinnuteqaatiminut akineqarneq ajornerminut akerliuniutitut. Taanna ukiuni arfineq-marlunni Kalaallit Nunaanni sumiiffinni assigiinngitsuni 15-ini palasitut atorfinnut qinnuteqartarsimavoq, itigartinneqartarsimallunilu, tamatumalu kingorna atorfiit inuttassarsiuuteqqinneqartarsimallutik.
Narsami Qaanaamilu palasitut atorfinnut qinnuteqaatiminut kingullernut marlunnut akineqarneq ajornerminut akerliuniutitut Portu Qisuk sapaatiummat pingajussaa neriumajunnaalerpoq, tamannalu pivoq Parisimi qallunaat aallartitaqarfiata saavani, taannalu nakkutigineqaqqissaarpoq Frankrigimi piffissami kingullermi peqqarniitsuliortoqarnera pissutigalugu.
Taanna oqaluttuarpoq Frankrigip kujataani juullisioreerluni Danmarkimut uternermini aalajangersimalluni neriumajunnaarnini Parisimi aallartinniarlugu.
Biskoppip allaffia: Ippinnartoqanngilaq
Nuummili biskoppip allaffia malillugu pasitut atorfinnut qinnuteqartunut tamanut atorfinitsitsinermi periusaasartut tamarmik tamatigut malinneqartarsimasut, tamatumani ilanngullugu Narsami atorfiup inuttassarsiuunneqarnerani.
Taamatut ugeaviisimut Tamanut Kujataani, sapaatip akunnerani saqqummersumi, paasissutissiivoq Nuummi biskoppip allaffiani pisortaq Morten Nornild.
Morten Nornild aamma Tamanut Kujataani-mut oqaluttuarpoq isumaqarluni Portu Qisummut suliassami ippinnartoqarsimanngitsoq.
– Sumiiffimmi ilagiit sinniisaat atorfinitsitsinissamut inassuteqartarpoq. Nalunngilara aalajangerneqareersimasoq illoqarfinni pineqartuni atorfiit kikkunnit inuttalerneqassanersut. Taamaattumik Portu Qisuk suli akissutisisimanngippat naatsorsuutigaara piffissami qaninnerpaami akissutisiumaartoq, Morten Nornild Tamanut Kujataani-mut oqarpoq.
Morten Nornildip ilanngullugu Tamanut Kujataani-mut oqatigaa nunami palasinik amigaateqarunnaartoq, Narsami atorfik inuttalerneqareerpat atorfiit tamarmik inuttaqalersimassammata.
Aamma Portu Qisuup nunami maani palasitut atorfinissinnaannginnerminik pakatsinerminik nammineq oqaluttuaa ugeaviisimi Tamanut Kujataani-mi atuarsinnaavat.
Ugeaviisi Tamanut Kujataani akeqanngitsumik aasinnaavat uani: