Biskoppi: Eqqaassutissamik serlersaarineq - qanoq iliuusissaarunnermit piliaavoq
Københavnip Biskoppeqarfiani, Marmorkirkenip qullersaqarfianiittumi biskoppip Peter Skov-Jakobsenip, Hans Egedep eqqaassutissaa Marmorkirkenip silataaniittoq marlunngormat unnuakkut serlersaarfigineqarmat, "eqqaassutissanik aserorterineq paasisinnaannginnerarpaa".
Hans Egedep eqqaassutissaa - Københavnip qeqqaniittup Mamorkirkenip saavani eqqaassutissarpassuit allat akornanniittoq, marlunngormat unnuakkut qalipaammik aappaluttumik kuineqarsimallunilu ”decolonize”-mik allaffigineqarsimavoq.
Biskoppi Peter Skov-Jakobsen Sermitsiaq.AG-mit "Decolonize"-mik allattoqarsimanera eqqaassutissamillu serlersaarisoqarsimanera pillugit oqaaseqaqquneqarsimavoq.
Oqallinnerit soqutiginartut
”Decolonize” pillugu biskoppi allappoq:
- Oqallinnissat soqutiginartut aamma paasisaqarfissat nutaat ornippavut, tamattalu ullumikkut inuunitsinnit sunnertissimalluta inuugatta eqqaasinneqartarumaarpugut. Tamanna utoqqatsissutaanngilaq, isummanulli nassuiaataalluni. Kisimiikkunanngilanga, ukiut qulit ingerlaneranni, pingaarutillit pillugit isummamik allannguisimasutut, aamma kisimiikkunanngilanga ilaannikkoorialuni eqqarsartartoq: Mannamita ukiut 100-t qaangiuppata inunnit qanoq isumaqarfigineqassava?
Serlersaarisimaneq pillugu Peter Skov-Jakobsen allappoq:
- Eqqaassutissanik aserorterisoqarnera paasisinnaanngilara - soorlumi qanoq iliuusissaarunnermit piliaasoq, kalaallillu inuiaat soriarsinnaanngitsutu uanga isiginngilakka. Namminersorlutik Oqartussanit naligiimmik oqartussaaqataanermillu ingerlatsisoqarneranik ukiorpassuarni eqqaasinneqartarsimavugut. Sumiluunniit oqaaseqarfiusinnaasumi persuttaasarneq aserorterisarnerlu aqutsisuussanngillat, biskoppi erseqqissaavoq, nangillunilu:
Ammip qalipaataa tunngavigalugu assigiinngissitsinermi imminut takusinnaannginneq
- Ammip qalipaataa tunngavigalugu assigiinngissitsisarneq pillugu maanna oqallinnermi soqutiginartoq tassaavoq, tamatta immitsinnut takusinnaannginnerput pilugu immitsinnut eqqaasittarnerput, aamma kinguaassiuutinik atuisarneq inuiaassuserlu pillugit inuit oqaluuserigaangatsigit, sorpassuartigut immitsinnut isornartorsiorsinnaasariaqarpugut. Tamatumunnga peqatigitillugu qanga pisimasut uterfigisarnissaat pitsaasuuvoq, qularutiginngilarami qanga isummat oqaatsillu atorneqartarsimasut aamma iliuuserineqartarsimasut ullumikkut paasisinnaassanngikkivut.