Birna Bjránsdóttir

Birnap arnaa: - Inuugallarneratut eqqaamassavarput

Toqusunik misissuisartoq ullumi matoqqasumik killisiorneqassaaq, tamanna Birnap ilaqutaasa piumasarisimavaat. Tusagassiorfiit eqqarsaatiginnissasut ilaqutariit qinnuiginnipput

Toqusunik misissuisartoq Birna Brjánsdóttirimik misissuisoq, matoqqasumik killisiorneqassaaq. Tamanna ilaqutaasut eqqarsaatigalugit pivoq, panitsik qanoq toqusimanersoq tusagassiorfitsigut issuarneqarnissaanik annerusumik paasisaqarusunnginnamik.

Sapaatip-akunnerata siuliani napparsimmavimmi palasip Bjarni Albertssonip tusagassiorfinnut Facebookikkut qinnuiginnippoq. Taassuma ilaqutariit Birna Brjánsdóttirip tammarnerata kinguninngua qanimut malinnaaffigisimavai.

Tusagassiorfiit ilaat Birnap qanoq toqusimaneranik erseqqarippallaamik oqaluttuarsimasut, taanna allappoq.

- Allaatiginninnerit ilaat imaakkamik annernartorujussuullutik aamma anniaateqarnerpaasut ilaqutariit niaquanni nuanninngitsunik assiliartalersuillutik, taanna allappoq.

Atuaruk: Birna pillugu suliami ulloq kingulleq

Birnap arnaa, Sigurlaug Hreinsdóttir, aamma ersarippallaamik allaatiginninnissamik tunuarsimaartoqarnissaanik qinnuiginnippoq. Birnap tammarnerani aamma toqunerani tusagassiorfiit allaaserinninnerat pitsaasimasoq, visir.is-imut oqarpoq, kisianni eqqartuussisoqarnerani allaaserinninneq ingasappallaalersimavoq.

- Inuugallarami inunnit qanoq ittuunera eqqaamaneqarnissaa pingaartuusoq isumaqarpunga, qanoq toqusimanera pinnagu, anaanaasoq visir.is-imut oqarpoq.

Sigurlaug Hreinsdóttirip Birna nukittuutut, sapiitsutut aamma eqqissisimaartuullunilu aalajaatsuusoq oqaatigaa.

- Taakku assigineqanngitsut pigai, piffissamilu eqqaaniaannavinnissai aalajangiuppakka. Eqqaamasat pinnissusaasa ikiorpaannga. Uannut asanninnerata sapaatip-akunnerini inuuninni artorsarfiginerpaasanni ikiorpaanga, taanna oqarpoq

Powered by Labrador CMS