Birnamut tunngasumi suliami aalajangiisoqassaaq
Thomas Møller Olsenip pinngitsuutinneqarnissaa illersuisuanit upperineqarpoq
Islandip eqqarsuussiviani aqagu tallimanngornermi aalajangiisoqassaaq. Thomas Møller Olsen kredsrettimit ukiuni 19-ni parnaarussassanngorlugu pineqaatissinneqarpoq, tassani 20-nik ukiulimmut Birna Brjánsdóttirimut toqutsisimasutut eqqartuunneqarluni septembarimi ukioq kingulleq.
Thomas Møller Olsenip toqutsinermut pinngitsuunerarnini attatiinnarpaa, suliarlu Islandip eqqartuussivianut suliareqqitassanngortillugu.
Politiit uppernarsaataat illersuisuanit Björgvin Jónssonimit apeqquserneqarput.
Tassami biilini aappaluttuni Kia-t aquutaanni gearinilluunniit nikittaataani aammik nassaartoqarsimanngitsoq tikkuarpaa. Thomas Møller Olsen biilini aquttuummat arlaatigut aammik nassaartoqarsimasussaagaluartoq oqaatigalugu.
Umiarsuarmi inuttat ilaata allap Birna saassussimasinnaagaa aamma illersuisup takutinniarsaraa.
Arnap inuusuttup toqutaareernerata kingorna kuummukaanneqarpoq, ujaasisoqareernerata kingorna immami nassaarineqarluni. Aqqutigineqarsimasoq ilisimaneqarpallaanngilaq, aamma biilit isorartussummut aqunneqarsimanerat ataqatigiinnani.
Thomas Møller Olsenip toqutsinermut allamut pisuutitsiniarnera uppernanngilluinnartuusoq unnerluussisup Sigrid Friðjónsdóttirip oktobarip 29-ani oqaatigaa. Uppernarsaatit tamarmik Thomas Møller Olsenimut tikkuaqqasut oqaatigalugu.
Thomas Møller Olsen pisuutinneqarluni eqqartuunneqassappat, sakkukinnerusumik pineqaatissinneqarnissaa Björgvin Jónssonimit anguniarneqassaaq. Arnamut inuusuttumut Thomas Møller Olsen saassussisuunngitsoq aamma toqutsisimanngitsoq Björgvin Jónssonip upperaa.