Birnamut toqutsineq: Aalajangiineq allanngortinneqanngilaq
Thomas Møller Olsen ukiuni 19-ni parnaarussaavoq
Islandimi kredsretsip aggustimi aalajangiussaa Islandip Eqqartuussiveqarfianit attatiinnarneqarpoq. Islandimi nutaarsiassaqartitsiviit allapput.
Birna Brjánsdóttirimut ukioq kingulleq januarip 14-ani toqutsisimasutut eqqartuunneqarpoq.
Eqqartuussaq atuarneqarmat eqqartuunneqartoq najuutinngilaq.
Thomas Møller Olsen oktobarip 29-ani nassuiaatinneqarpoq, tassani qanoq eqqartuunneqassanersoq isumaqatiginninniutigineqarluni.
Unnerluussisup Sigríður Friðjónsdóttirip suliami pineqartumi qularuteqanngilaq, tassa Thomas Møller Olsen toqutsisuusoq qularinngilluinnarpaa.
Suliap ingerlateqqinneqarnerani Thomas Møller Olsenip Polar Seafoodimi sulisut allat pisuuteriaraluarpai. Tamannali kredsretsimisuulli Islandip eqqartuussiviata upperinngilaa. Tassami angut pineqartoq Polar Nanumit biilinut ikisoq uppernarsaateqarpoq.
Thomas Møller Olsenip Birna Brjánsdóttir ilaasoralugu kisimiilluni ingerlaqqittoq politiit misissuinerisa takutippaat. Talittarfiup illuata tungaanukariarluni Birna Brjánsdóttir nukersorfigaa.
Tassanngaannit kuummut igeriunneqarpoq, sapaatillu akunnera ataaseq qaamgiuttoq immami Birna Brjánsdóttirip timaa nassaarineqarpoq.
Birna Brjánsdóttir biilimut Kia-mut aappaluttumut ikivoq januaarip 14-ani 2017-mi. Tassani Thomas Møller Olsen aquttuuvoq, kilisaammi inuttaaqataasoq aamma biilineeqataalluni. Tamanna videokkut takuneqarsinnaavoq.
Tassanngaannit arnaq 20-nik ukiulik periarfeeruppoq, ujaasinerlu ingerlanneqarluni. Birna Brjánsdóttirip timaa januaarip 22-ani nassaarineqarpoq.
Biilit atortakkat Kia-t pissutaallutik kilisaammi inuttaasut pasineqalerput. Ujaasisoqarnerani Reykjavikimit kilisaat avalappoq, Islandimi politiit miusaqarmata uteqqilluni.
Kilisaammi inuttat pingasut siullermik tigusarineqaqqaarput. Siulleq ingerlaannaq iperagaavoq. Misissuilluartoqareermat aamma ataaseq iperarneqarluni.
Toqutsineq Islandimi Kalaallit Nunaannilu tupassutigineqaqaaq. Islandimi toqutsisoqarsimaneranik suliaqartarnerit akuttupput, arnap inuusuttunnguup toqutaanera Islandimi innuttaasunit tupassutigineqarluni.