Biologit aalisartullu isumaqatigiittut: Ajorluinnartoqarpoq

Qeqertarsuup Tunuani qaleralittassanik ukiuni kingullerni qaffaasaqattaarnerit qalerallit ikiliartulernerannik kinguneqarsinnaasoq biologi, SQAPK aamma Avannaata Kommuniani Aalisarnermut Ataatsimiititaliap siulittaasua isumaqarput.

– Oqaatigissalluguli pingaaruteqarpoq, Naalakkersuisut kissaatigigaat Qeqertarsuup Tunuani qaleralinniarneq ataavartumik akornuserneqanngitsumillu ingerlassasoq, qaleraleqassuserlu maannamut ernumananngitsumik inissisimasutut isigaarput, SQAPK-mi siulittaasup tullia Søren Vetterlain taama oqarpoq.

Naalakkersuisut siorna ukiup naajartornerani avammut nalunaaruteqarput sinerissap qanittuani qaleralittassiisarneq,
ukiuni sisamani, biologit siunnersuutaat malillugit pisassasoq. Naalakkersuisulli septembarip aallartilaarnerani Qeqertarsuup Tunuani sinerissap qanittuani qaleralittassat 2.400 tonsinik qaffappaat, pisassat katillugit 10.580 tonsinngorlugit, tamannalu pivoq naak biologit Qeqertarsuup Tunuani pisarineqarsinnaasut 5.120 tonsiussasut innersuussutigigaluaraat.

Aviisi Sermitsiaq taama allappoq.

Aalisartut biologit pisassiissutissatut innersuussutaannut isumaqataasarneri akuttupput, ingammik qaleralittassiissutit pineqartillugit. Maannali sinerissap qanittuani aalisartut kattuffiata SQAPK-p kiisalu Avannaata Kommuniani kommunalbestyrelsimi aalisarnermut piniarnermullu ataatsimiititaliap siulittaasuata Helle Siegstad, Pinngortitaleriffimmi aalisakkat qaleruallillu pillugit immikkoortortaqarfimmi pisortaasoq, Qeqertarsuup Tunuani qaleralittassat qaffattuarnerisigut siunissami qalerallit ikiliartulernerinik kinguneqarsinnaasoq ernummateqarmat isumaqatigaat.

Isumaqatigiittarnerit akuttusuut

Naalakkersuisut pisassiissutinik qaffaanerat aalisartut ukiup sinneranut aalisarsinnaalernerannik kinguneqarpoq. SQAPK-lli siulittaasuata tulliata pisassat qaffanneqarnerat, siunissaq unngasinnerusoq eqqarsaatigalugu Qeqertarsuup Tunuani qaleraleqassutsimut kingunerlussinnaammat, eqqarsarnartoqartippaa.

– Taamaattumik Helle Siegstadip pisassiissutit qaffattuarnerisigut aalisarnerup innarlerneqarsinnaanera pillugu, ernumassuteqarluni nalunaarnera ilalerparput, Søren Vetterlain Saqqameersoq oqarpoq.

Aviisimi Sermitsiami atuarnerusinnaavutit, Avannaatalu Kommuniani aalisarnermut ataatsimiititaliaq qanoq isummernersoq paasisaqarfiginerusinnaallugu:

Powered by Labrador CMS