Biologi: Kalaaliminernik nerisinnaatitaasariaqarpugut

Biologi Aviaja Lyberth Hauptmann nerisassanik inerteqqutaasunik aasaq manna nerisimavoq, tassalu mitip mannianik mikialersimasumik. Mitimmi manniinik mannissarniartoqaqqusaanngilaq, biologillu tamanna uggoraa.

- Manniit taakku qerisuupput, sungaartunngulersimapput tappiorannartut asiutitsilernerannit qorsuttaqaleriartortut, aamma tipeqarput mikialersimanerat nalunaraluni, taanna nassuiaavoq.

- Mamaa Gamle Olemut (immussuarmut) assiguneruvoq. Mannik qerisoq qituliartuaalersimalluni mamarluinnartoq.

Manniit tappiorannartortai inussutissartaalu misissorniarlugit Namminersorluik Oqartussanut qinnuteqarsimavoq.

Mamaali kisiat pissutigalugu mannissarniartoqaqqusaannginnera uggorinngilaa.

Aviaja Lyberth Hauptmann isumaqarpoq, manniit kalaallit nerisannaavinut ilaammata isumagineqartariaqartut.

- Mannissarniaqqusaannginnikkut inuit inuussutissalinnik, avataanit tikisitaanngitsunik nerisinnaanerat mattunneqarpoq. Nerisassat peqqinnartut inuit peqqissusaannut tunngaviulluinnartut inunnut nereqquneqanngillat. Napparsimannginnermiit peqqissuuneq pitsaanerunngilaq, pitsaaneruvorli timikkut, tarnikkut inooqataatanikkullu ajunngitsumik atugaqarneq, Aviaaja allaaserisamni allappoq.

Taassuma aamma erseqqissaatigaa, mannissarniartoqartartillugu inerteqquteqarneq ajornartorsiutaasoq. Aviaja Lyberth Hauptmann naapertorlugu tamatuma takutippaa, inerteqquteqarneq innutaasunit paasiuminaatsinneqarlunilu ataavartumik malinneqanngitsoq.

- Biologitut sulininnut atatillugu ukiuni marlunni nunami angalangaatsiarsimavunga. Angalanimmalu ilaani tupaallaatigeqalugu paasilerpara, innuttaasut inuunerminni atugaannik kissaataannillu aalajangiisartorpassuit qanoq ilisimasakitsiginerat. Uanga nammineerlunga qanoq ilisimasakitsiginera, Aviaja Sermitsiaq.AG-mut oqarpoq.

Innuttaasut atugaannik paasisaqarneruneq

Paasinninnerata tamatuma allagaqartippaa, tassani oqaatigaa, innuttaasut aalisarnermut, piniarnermut kiisalu pinngortitami uumassusillit inuttullu suut attanneqarsinnaanersut pillugit malittarisassaliortarnermut peqataatinnerusariaqartut. Aviaja Lyberth Hauptmannip tamanna inuussutissanut oqartussaanersut taavaa, oqaaseq Alaskami Inunnit pissarsiarisimavaa. Alaskami inuussutissat isumannaatuunissaat ukiorpaalunni ukkatarineqarsimavoq, imatut paasillugut, innuttaasut nerisassaqartariaqartut.

- Qnoq ililluta kalaaliminertorsinnaatitaalernissarput aamma uumasunik illersuisarnitta pitsaanerpaamik qanoq ingerlanneqartarnissaa pillugit inaarutaasumik akissutissaqartinngilara. Miteqartittuaannarusukkutsiguli, inuit pisiniarfimmi kukkukuut manniinik pisisinnaatillutik sooq inatsimmik unioqqutsitsillutik mannissarniartarnersut paasisaqarfiginerusariaqarparput.

- Immaqa takorloorneqarsinnaavoq arlaatigut siunnersiuisoqalersinnaanneq, qanoq aalisarnerup piniarnerullu ingerlanneqarsinnaanerannik ilusilersueqataasinnaasunik. Imaassinnaavorli immitsinnut pitsaanerusumik oqaluuttarnissarput tassani amigaataasoq.

Kingusinnerpaamik pisiarineqarsinnaanerat

Aviaja Lyberth Hauptmannip inuussutissat pillugit inatsit isigineqartariaqartutut ilanngullugu oqaatigaa, tassani pivaa, inatsisimmi pineqartut piviusorlu innuttaasut amerlaqisut misigisartagaat imminnut ungasippallaartut.

- Assersuutigalugu nunaqarfik ataaseq qaammatini arfinilinni umiarsuarmik pajuttumik tikinneqarsimanngissinnaavoq, silalu aalisarfiusinnaananilu piniarfiusinnaasimanani. Taamaattoqartillugu najukkami pisiniarfiup inuussutissat kingusinnerpaamik pisiarineqarfissaat qaangiutereeraluartoq tunisisarsimassaaq, aamma inerteqqutaagaluarpalluunniit.

- Uanga takunnissinnaanera malillugu nunaqarfiit nunaqarfinnilu pisiniarfiit ataasiakkaat tunisassanik aaqqissuussisarneq namminneerlutik akisussaaffigisariaqarpaat.

Siorna Nuummi Brugsenip saavani inuussutissanik tuniniaanermut inuussutissalerinermi oqartussat akuleruteriasaarput. Tamanna pivoq ukiorpassuiarni ammaannartumik tuniniaasoqaraluartoq.

- Paasisimasaqannginnermut pisannut tamanna assersuutavoq alla.

- Taamatut tuniniaasarneq inatsimmi 'nakkutigineqanngitsumik tuniniaanertut' taaneqarpat, taava tamatuma takutiinnarpaa, kalaallit ulluinnarni inuunerannut inatsit qanoq ungasitsigisoq. Aalisartorpassuimmi piniartorpassuillu taamaaliortarunanngillat, biologi quiassuarluni oqapoq.

Aviaja Lyberth Hauptmann aalisartut piniartullu ulluannut atatillugu Københavnimi Kalaallit Illuanni ullumi nalunaaqutaq tallimat qeqqanut oqalugiassaaq.