peqquserlunneq

Binzerip peqquserlussimanera norskinit pakatsissutigineqarpoq

Suliffissarsiornerni ilinniarsimangisanik ilanngussisarneq ajornartorsiutaasoq annertusiartortoq Michael Binzerip ilinniarfiginikuusaanit oqaatigineqarpoq. Taamaasiornerit pillarneqaasaasuusariaqartut isumaqarput

- Ilinniagarisimasanni paasissutissiigaangama ilinniarfiit naammassinikuunngisakka aamma ilanngullugit allattarpakka. Sungiusaanermut kisimi 'taamaallaat' ilinniagaqarpunga Norgep timersornikkut højskoleani.

Michael Binzerip ilinniagarisimasani pillugit paasissutissiisarnini eqqortuuneq ajorsimasut nassuerutigaa. Taamaasiornini isumakkeerfigineqarsinnaanngisoq inuttaa blogimini oqaatigisareerpaa.

Norgep Idrettshøgskoleani (NIH) Michael Binzer siornatigut ilinniarpoq, tassani ilaatigut naammassinikuunngisani paasissutissaatiminut allattarlugit. Atuarfimmi tassani ilinniartut pisortaata Håkon Solbergip Michael Binzer pisumut tapersersunngilaa.

- Taamatut peqquserluttarnerit amerliartorput. Ilinniarnikuunngisanik ilaasa allattalernikuuaat. Taamatut paasissutissiinermi kinguneqartitsisoqartalernissaa Universititsini højskolenilu siunnersuutigineqartareerpoq, Håkon Solberg Sermitsiaq.AG-mut oqarpoq.

Iliuuseqarsinnaaneq ajornakusoortoq
Kinguneqartitsinerilli annertunerusumik iliuuseqarfigineqarsinnaanngitsut Håkon Solbergip oqaatigaa.

- Inuit taamaasiorsimasut NIH-mut attuumassuteqarunnaaraangata annertuumik iliuuseqarsinnaaneq ajorpugut. Taamatut peqquserluttoqarsimagaangat inuk pineqartoq attavigisarparput iliuusaat eqqortuunnginneralugit oqarfigisarlugit. Ilinniarfiginikuusammi naammassinikuunngisat naammassisimasutut nalunaarutigisarneri eqqortuunngilaq, Håkon Solberg nassuiaavoq.

Michael Binzerip NIH-mi atuarnerminit bacheloritut naammassinissaminut ukiup affaa amigaatigisimagaa Håkon Solbergip oqaatigaa. Bacheloritut naammassissagaanni 180 pointeqartoqartariaqarpoq, Michael Binzer 141-nik pointeqarsimasoq oqaatigaa. Aamma atuartut suut atuassaneraat ilinniarfiup aalajangigassarisaraa oqaatigaa.

Oqaaseqarusunngilaq
Michael Binzer Air Greenlandimi pisortaanertut atorfeqareernermi kingorna Tele-Postimi pisortaanertut atorfeqalerpoq 2013-mi apriilip aallaqqaataanit. Atorfimmit Michael Binzerip soraarniuteqarnera septembarip qulingani nalunaaruteqartoqarpoq.

Michael Binzer Sermitsiaq.AG-mut oqaaseqarusunngilaq.

Powered by Labrador CMS