aallarnisaasut

Binzer: Siunissamik pilersitsiniarluta sorlatsinnut utissaagut

Aalisartut piniartullu malunnartittarsimasaannik aallarnisaanermut anersaaq pilerseqqinniarlugu maligassiuisunik pisariaqartitsisoqarpoq. Inuussutissarsiortoq Michael Binzer isumaqarpoq

Michael Binzer sammisanut ilungersuussaminut tunngatillugu pilerituujuaannarpoq. Kalaallit Nunaannilu aallarnisaanermut kulturip nukittunerusup pilersinneqarnissaanut apeqqummut sammisat tamakku ilagilluinnarpaat.

- Imminut pilersornissamut takorluuineq eqeertissavarput, Sermitsiaq.AG-p ulloqeqqaanerani oqaloqatigimmagu oqarpoq.

Fonden for Entreprenørskabip Nunani Avannarlerni Naalakkersuisut Siunnersuisoqatigiiffiat suleqatigalugu nalunaarusiaq ippassaq saqqummiuppaat, tamatuma aallarnisaanermut kulturi Nunatsinni nukilaattumik ineriartortinneqartoq takutippaa.

Atuaruk: Nunatsinni aallarnisaaneq suli atugaavallaanngilaq

Meeqqerivimmi aallarnisaaneq
Michael Binzer ullumikkut siunnersortitut sulisoq tamatumunnga isumaqataavoq.

- Meeqqat atuarfianni faagitut ilanngunneqartariaqarpoq, naqissusiivoq, ingerlaannarlu eqqarsarialaariarluni nangippoq:

- Meeqqerivimmi aallarteereertariaqaraluarpugut.

Piniartut aallarnisaanermut anersaaqarsimapput
Michael Binzerip naak mutiusumik ingerlatsinermut tunngasunik oqaatsinik atuigaluarluni, kalaallit kulturianni aallaaviusumi nassaarinneqqinnissamut tunngassuteqartoq isumaqarpoq.

- Oqaluttuarisaanermut tunngatillugu paarlattuanik siuaasagut taamanikkut aallarnisaanermut anersaaqarput, aalisartuullutillu piniartuupput, taanna oqarpoq.

Uniinnarluni pilersorneqarneq
Kisianni imminut pilersorusussusermut tunngatillugu naalagaaffeqatigiinneq pitsaasuinnaasimanngitsoq, Michael Binzer isumaqarpoq.

- Naalagaaffimmit tapiissutit uniinnarluta pilersortinnermut sungiussitinnikuuaatigut. Akisussaaffimmik arsaagaanikuuvugut, taanna isumaqarpoq, taassumalu tikkuarpaa siullermik nunasiaataanerup, kingornalu danskit naalagaaffiata atugarissaartuuneranik issuaaneq aallarnisaanermut anersaamut tunngatillugu ajortuusimasoq.

Annertuumik suliniuteqarnissamik piumasqartoq
Pisortat aamma namminersortut imminut pilersornermik takorluuinermik inuusuttut akornanni pilersitseqqittariaqartut aamma taanna isumaqarpoq.

- Inuussutissarsiornermut naalakkersuisoqarfik aamma ilinniartitaanermut naalakkersuisoqarfik siuttuullutik ilinniarfinnut tamanna eqquttariaqarpaat, tamannalu inuussutissarsiortunik taperserneqarluni pissaaq, taanna isuamqarpoq.

Island maligassiusinnaasoq
Inuusuttut suliffimmik namminersortumik pilersitserusulernerannik maligassiuisut pingaartuulluinnartut, Michael Binzer isumaqarpoq.

- Assersuutigalugu angajoqqaat suliffeqarfinnik namminersortunik ingerlatsisuusut avatangiiserigaanni, aallarnisaanissamut anersaaq pilertartoq takusinnaavara.

Nuna sanilerisarput qiviaraanni aallarnisaanermut anersaamik nukittuumik malunnaateqarfiusorujussuuvoq. Tassangalu isumassarsianik aallerfissaqqippoq.

- Uteriissuseq qasusuissuserlu pisariaqartinneqartoq pigisorujussuuaat. Aningaasaqarnikkut nammineernissamut piumassuseqartorujussuupput.

- Tamakkorpiaallu naneqqittariaqarpagut, Michael Binzer isumqarpoq.

Powered by Labrador CMS