Biilit assakaasukui illoqarfimmi kusassaataallutillu meeqqanut nuannaartitsisarput
Narsami najukkami ataatsimiititaliaq, namminneq piumassutsiminnik suliaqartartut ikiortigalugit, meeqqat pinnguartarfissaannik nutaamik sanaartorpoq illoqarfillu kusassarlugu.
Arfininngorneq sapaallu Narsami meeqqanut ulloritinneqarput.
Najukkami ataatsimiititaliaq 40 - 50.000 koruunit missaannik nalilinnik pinnguartarfimmi atortussanik pisiaqarsimavoq, innuttaallu namminneq piumassutiminnik ikiuukkusuttut assaapput, pilattaapput pinnguartarfissamillu ikkussuillutik, inuusunnerusut biilit assakaasukuinik qalipaapput, pinnguartarfimmi pinnguarfigineqarsinnaasunik.
Suliniummut aningaasaliissuteqarsimapput:
Pilersuisoq, Brugsen, Neqi, Inuili, Permagreen, INI, Karl Rothaus Olesen aamma Kommune Kujalleq
Najukkami ataatsimiititaliamut siulittaasoq Henning Jensen oqaluttuarpoq, najukkami ataatsimiititaliami amerlanerusussuteqartut aalajangersimagaat, ataatsimiititaliap aningaasaatai meeqqat ajunngitsumik atugaqarnissaannut atorneqassasut, aamma pinnguartarfimmik nutaamik sanaartorneq namminneq piumassutsiminnik suliaqartartunit isumagineqassasoq.
Namminneq piumassutsiminnik ikiuukkusuttut 55-60-it takkussimasut
Henning Jensenip ilanngullugu oqaluttuaraa, najukkami ataatsimiititaliaq pinnguartarfinnik marlunnik siorna ikkussuisimasoq kiisalu issiaartarfinnik qulinik eqqaavinnillu 13-inik pisiaqarsimasoq. Taamatut iliuuseqarnikkut ataatsimiititaliamit neriuutigineqarpoq, inuit aqqusinermi maangaannaq eqqaajunnaarlutik eqqaavinnik atuisarlissasut.
Arfininngormat ullaakkut inuit 50-60-it namminneq piumassusertik malillugu takuupput, taakku affaat illoqarfimmi eqqakkanik katersipput, sinnerilu pinnguartarfissamik ikkussuillutik.
Pilersuisoq Brugsenilu namminneq piumassutsiminnik suliaqartut ullaakkorsiutissaannik isumaginnipput, Inuili ullup qeqqasiutissanik sassaallissaaq. Neqi sapaatiuppat unnukkut, namminneq piumassutsiminnik suliaqartunut qasusisamassaqisunut savaaqqamik sassaallissaaq.