Biilit assakaasui quaannaveeqqutitallit atorneqarneri misissuiffigineqassapput
Inatsisartut siunnersuummik ullumi akuersipput, Naalakkersuisut peqquneqarput aqqusinerniknungullartitsisarnermik silaannarmillu mingutsitsinermik annikillititsinissamut periarfissanikmisissuinissaq siunertaralugu naalagaaffimmi oqartussaasunut saaffiginneqqullugit.
Biilit assakaasui ukiorsiutit kikiaarartallit atorneqanngiinnarsinnaappat? Tamanna Inatsisartut misissuiffigerusuppaat.
Taamaammat angallannermik isumannaallisaanermut sunniuteqanngitsumik aqqusinernik nungullartitsisarnermik silaannarmillu mingutsitsinermik annikillititsinissamut periarfissanik misissuisoqarnissaa siunertaralugu Naalakkersuisut naalagaaffimmi oqartussaasunut saaffiginneqquneqarput.
Siunnersuut saqqummiunneqaqqaarmat siunnersuutigineqaraluarpoq Naalakkersuisut peqquneqassasut inunnik angallassissutini biilini assakaasut quaannaveeqqutillit atoqqusaajunnaarnissaat siunertaralugu naalagaaffeqatigiinni oqartussaaffinnut saaffiginneqquneqassasut. Siunnersuulli allanngortinneqarpoq, Naalakkersuisut saaffiginneqquneqarlutik aqqusinernik nungullartitsisarnermik silaannarmillu mingutsitsisarnermik annikillititsisinnaasumik misissuisoqarnissaa anguniarlugu, aqqusinermi angallannikkut isumannaallisaaneq sunnerneqartinnagu.
Peqqinnissaq
Assakaasut kikiaasaaqqanik quaannaveeqqutitallit inuit biiliinut atornerani angallannikkut sillimaniarnermut iluaqutaasarput. Biilit unitsinniarlugit isorartussuseq atorneqartartoq annikinnerusarpoq, angallannermilu ajutoornerusinnaagaluartut pinngitsoortinneqarsinnaallutik. Biilit assakaasui kikiaasaarartaqarlutik quaannaveeqqutillit, aqqusinermut tunngalluarnerusarput, pingaartumik aqqusineq angallaviusussaq ilungersunartillugu.
Assakaasulli kikiaasaaqqanik quaannaveeqqutitaqartut assakaasunut allanut sanilliullugit aqqusinernut nungullartitsinerusarput. Aqquserngullu nungullariartornerani pujoralaasaaqqat pinngortut inunnit najuussorneqartarlutik.
Kalaallit Nunaanni inuinnaat biilii 5.000-it sinneqartut nalunaarsorneqarsimapput.
Isumaliutissiissut
Politiit ukiumoortumik kisitsisitigut paasissutissaataat naapertorlugit politiit 2018-imi aqqusinikkut angallannermi ajutoornerit 138-t nalunaarsorsimavaat, taakkunamiga 58-it inuit ajoqusernerannik nassataqarsimappu. Siunnersuuteqartup nassuiaammini ilanngullugu oqaatigaa Norgemi biilit assakaasui quaannaveeqqutitaqartut biilit affaannit atorunnaarneqarneranni angallannermi ajutoornerit amerleriaateqalaarsimasut. Peqqinnissarli eqqarsaatigalugu iluaqutissartaqarluni.
Siunnersuulli taamaatsillugu akuerineqanngilaq. Inatsisartut Inatsisinut ataatsimiititaliaannit maluginiarneqarpoq Kalaallit Nunaanni angallannermi atugassarititaasut, Norgep avannaanit allanneerusut.
- Norgemili misissuinerit inernerinik imaaliinnarluni Kalaallit Nunaannut nuussisoqarsinnaanersoq apeqqutaavoq. Norgemi misissuinerni illoqarfiit Oslo, Drammen, Stavanger, Bergen kiisalu Trondheim ilaatinneqarsimapput. Assakaasunik quaannaveeqqutitalinnik atuinerup aqqusinikkullu angallannermi ajutoornerit amerlassusiisa ataqatigiinnerisa aamma nunami maani atuussinnaaneranut pissutsit arlallit apeqqutaassapput, minnerunngitsumik silap pissusaa aqqusinermilu pissutsit , Inatsisinut ataatsimiititaliaq isumaliutissiivoq.