nukissiorneq minguitsoq
Biilinut innaallagiamoortunut immiisarfiit siulliit aajuku
Ukiuni arlaqartuni biilinut innaallagiamoortunut immiisarfiit piumaneqarnikuupput. Nuummi pisortat immiisarfii siulliit ikkunneqangajalerput
Nunatsinni biilinut innaallagiamoortunut inissiarsuarni, ataatsimoorussanik biilinut unittarfilinni najugaqaraanni immiinissamut periarfissanik amigaateqarneq akimmisaarfiit annerit ilagaat.
Illuinnarni illunilu uiguleriinni najugaqartut silami ikkuffinnik atuisarput. Kisiannili innuttaasut inissiarsuit ilaanni najugaqartut portusuumiit igalaakkut ledninginik biilimik innaallagiamoortut, biilit unittarfianniittut tungaannut ningitsisalersimapput
Aasaanerani illoqarfiit annersaanni ikkussuineq
- Tamanna arlalinnik peqquteqartumik naleqqutinngilaq, taamaattumillu innuttaasunut, inissiarsuarni najugaqartunut immiiffissanik iluameersunik piaarnerpaamik pilersuisoqartariaqarpoq.
Taamaattumik aasap ingerlanerani suliniummik ingerlatsisoqassaaq, tassanilu Nuummi inissiarsuit pingasut eqqaanni immiiffissanik ikkussisoqassaaq.
Assit takukkit: Biilit ilulissanik allallit nutaat takuvigit?
Kommuneqarfik Sermersuumit oqaatigineqarpoq, immiisarfiit (marluk) Qinngorpumi ikkunneqarnissaat ilimanartoq aamma ataaseq Nuussuarmi imaluunniit illoqarfiup qeqqani.
Taamatuttaaq Nuup qeqqani immiinasuarfissamik ikkussisoqassaaq. Taanna kommuni naapertorlugu, Nuuk Centerimi naqqup-iluani biilit unittarfianut inissinneqassaaq.
Politikerip nuannaarutigigaa
Avatangiisinut pinngortitamullu naalakkersuisoq, Mala Høy Kukó (A), illoqarfimmi innuttaasut allat assigalugit tassani biilini immiisarfimmut ullut tamaasa ikkussinnaassavaa.
- Uanga nammineerlunga biilinik innaallagiamoortunik atuisuuvunga naammagisimaarinnittoq, aammalu inuit suli amerlanerusut biilinik innaallagiamoortunik atuilernissamut pitsaanerusunik periarfissaqalernissaat nuannaarutigaara. Suliniut Kalaallit Nunaata minguinnerulernissaanut aqqutissiueqataavoq, politikeri oqarpoq.
Nuummi inissiaqarfinnit pingasuusunit misilittakkat ataavartumik aaqqiissutissamik nassaarniarnissamut atorneqassapput, taamaalillunilu illoqarfinni erngup nukinganik atuiffiusuni arfinilinni tamani biilinik piginnittut immiiffissanik pitsaasunik neqeroorfigineqarsinnaalissapput.
Sermitsiaq.AG innaallagiaq akeqanngitsuussanersoq paasiniarlugu Nukissiorfinnut saaffiginnippoq, aammalu illoqarfinni allani immiisarfiit pilersaarutaanersut tusarniarlugu