Biilinut inaallagissamik ingerlassuteqartunut immiisarfiit nutaat

Nukissiorfiit biilinut innaallagissamik ingerlassuteqartunut immiisarfinnik nutaanik ukiortaareerpat ikkussuissapput, sukkasuumik immiisarnerup saniatigut biilit innaallagissamik ingerlassuteqartut aamma hybridiusut batterii sukkasuumik immersinnaalissallutik. Taamatut aaqqissuussineq Norgemi, savalimmiuni Finlandimilu atugaareerpoq.

Nukissiorfiit Sloviniami suliffeqarfik Etrel isumaqatigiissuteqarfigisimavaa, Kalaallit Nunaanni biilinut hybridiullutillu innaallagissamik ingerlassuteqartunut siunissami immiissutissamik tunniussissasoq.

Aviisi Sermitsiaq taamatut allappoq.

Akiliisarnissamut aaqqiissuteqartoqassaaq, tassani pisartagaqarnissamik isumaqatigiissuteqarnikkut assersuutigalugu inigisap eqqaani immiisarfeqalertoqarsinnaavoq. Aamma suliffeqarfiit suliffeqarfiup biiliinut sulisullu biiliinut immiisarfissamik ikkussisitsisinnaassapput, soorlu aamma aningaaseriviit, akunnittarfiit pisiniarfiillu sullitaminnut immiisarfiliisitsisinnaasut.

Misilittagaqarluartoq

– Nukissiuuteqarnermik ingerlatseqatigiiffittut nunanit allanit kiffartuunneqartariaqassanngikkutta, immiisarfimmik nammineq isumagisinnaasatsinnik sullissutigisinnaasatsinnillu Etrel tunniussissasoq isumaqatigiissuteqarfigisimavarput. Etrel nunani assigiinngitsuni 40-ni immiisarfileereersimavoq, taakkununnga ilaallutik Savalimmiut, Finland Norgelu, aamma ilisimavarput Nunatsinni silap pissutsillu allat atuunneranni immiisarfik ajunngivissumik ingerlasinnaasoq. Nuummi qullersaqarfitta silataani piffissami sivisunerusumi immiisarfeqareerpugut, taanna apitillugu, anorersuartillugu siallertillugulu ajunngivissumik ingeralvoq, Nukissiorfinni nukissiuuteqarnermut pisortaq Kaspar Mondrup oqaluttuarpoqp.

Imiissutit Sermitsiami paasisaqarfiginerukkit - ugguuna iserfigisinnaavat:

Powered by Labrador CMS