Biilinik aporseriarluni qimaasoq pillugu saaffiginnissutit nutaat 50-it

Midt- og Vestjyllands Politi, ataasinngormat unnukkut sakkutuumik Kalaallit Nuaanneersumik 22-nik ukiulimmik apuilluni toqutsereerami qimaasoq pillugu saaffiginnissutinik nutaanik 50-it missaanniittunik pingasunngormat ullumikkullu pissarsisimapput. TV Midt/Vest taamatut allappoq.

Poliit video ippasssaq tamanut saqqummiuppaat, video, politiit naapertorlugit biilimik sakkutuumik aporsisumik takutitsisoq.

Sulili aalajangiisuusinnaasumik paasisaqartoqanngilaq.

- Aporsisoq suli kinaassusersinngilarput, Viborgimi politikommissæri Christian Toftemark, TV Midt/Vestimut oqarpoq.

Politiit saaffiginnissutinik misissuillutik annertuumik suliaqarput.

- Inoqarpa biilimik ajoqutilimmik takunnissimasunik, imaluunniit inoqarpa eqqaamiuminnik aalakoorlutik biilersimasunik ilisimannittunik, pineqartullu biilianik ulluni marlussunni akunnissimanngitsunik. Isumaqarpugut taakku aqqutigalugit apuisoq nassaarissagipput. Saaffiginnissutit taakkununnga tunngassuteqartut tassaapput, nukivut tamaasa atorlugit maannakkorpiaq misissuiffigisavut, Christian Toftemark TV Midt/Vestimut oqarpoq.

- Biilimik qaamasumik mikinerusumillu aamma siuata igalaartaatigut ajoqutilimmik takunnittoqarsimassappat tusarfigerusuppavut. Apuisoq tigusarigutsigut tamanut nalunaarutigiumaarparput. Innuttaasulli paasissutissaateqarunik uagutsinnut iluaqutaasinnaasunik saaffiginnittarnissaat kissaatigaarput, Christian Toftemark oqarpoq.