Bibi Chemnitz aamma Suspekt atisanik ilusilersukkaminnik saqqummersitsipput
Bibi Chemnitz Suspektimik suleqateqarluni atisanik ilusilersukkaminnik saqqummersitsissapput tallimanngorpat. Nipilersoqatigiit Danmarkimeersut Bibi Chemnitzip Nuummi pisiniarfiani saqqummersitsinermi peqataassapput.
- Akuerineqartutut misiginartorujussuuvoq.
Suspektimik suleqateqarneq pillugu aperineqarami Bibi Chemnitzimik piginneqasaasoq David Røgilds akivoq. Suspekt Danmarkimi hiphopertartutut ilisimaneqarluartuupput.
Bibi Chemnitzip Suspekt peqatigalugu atisanik ilusilersukkat tallimanngorpat saqqummiutissavai.
Saqqummersinneqartussat qaammatini arlaqartuni saqqummersinneqarnissaannut piareeqqanikuugaluarput, Suspektili Kalaallit Nunaannukarnissaat utaqqimaaqqaarneqarsimavoq, David Røgilds nassuiaavoq:
- Saqqummersitsinissap utaqqimaaqqaarneqarnera nukappissat (Bai-D, Orgi-E og Rune Rask, aaqq.) akuerivaat. Kalaallit Nunaannik nuannarisaqarluartuullutillu ataqqinnittupilussuupput. Ilusilersukkatta isumaat oqaluttuarigaangatsigit qiiaammertarsimallutik oqarput.
Ataatsimooqatigiinneq ilasseqatigiinnerlu
Bibi Chemnitz aamma Suspekt ukiuni arlaqartuni immikkoorlutik suliaqarnikuupput, suliffeqarfillu 2020-mi Suspektimit mailinnannikuuvoq suleqatigiikkusunnginnersut.
- Atisanik ilusilersuilluta taava aallartippugut, isumaqatigiippugullu Suspekt Kalaallit Nunaannukarpat atisat saqqummiukkumaarlugit. Kalaallit Nunaannukarusuttarput, coronali pissutaalluni killilersuutit ajornartorsiutaanikuuvoq.
Maanna kiisami pilersaarutaat piviusunngulerpoq. Nuummi Akisuanerit Festivaleqarnerani Suspekt tusarnaartitsissaaq. Tallimanngorpat atisat saqqummiunneqarpata Suspekt aamma tusarnaartitsissaaq.
- Susupekt ualikkut pisiniarfitsinnukassapput, tassani ataatsimooqatigiillutalu ilasseqatigiissaagut, David Røgilds oqarpoq.
Anoraamik qallinnillu qalipaateqataanik saqqummiisoqassaaq.
- Atisat amerlassusaat killeqarput, nunguniissaata tungaanut tuniniarneqassallutik.