Bibi alutorsartitsivoq

Atisanik nutaalianik ilusilersuisartup Bibi Chemnitzip atisaliaanik pingajussaa Københavnimi atisanik sapaatip akunnera saqqummersitsinermi, Copenhagen International Fashion Fairimik taaguteqartinneqartumi, takutitsinermi isiginnaartitsisartut Nukâka aamma Nikolaj Coster-Waldau saarlerpaani inissisimapput qallunaat nunallu allamiut aviisisa aaqqissuisui nutaalianillu internetimi allaaserinnittartut, bloggerit allat ilagalugit.

Isiginnaariat 450-it missanniittut alutorsarlutik pattaapput, takutitsineq atisalianik taaguuserneqarsimasunik ”Cold World – Warm Heart” (Nunarsuaq issittoq – Uummat kissartoq) takutitsineq naammassimmat. Pattaattut sioqqutitsiarlugit inuusuttut 18it atisat eqqissisimaarluni imaluunnit timersorluni atorneqarsinnaarpasissut nipituumik nipilersuuserlutik pisuutigalugit takutippaat.

Eqquilluartoq
Isiginnaariat inuusuttut pinnersullu alutorinnippaseqaat.

- Wow, tassa uangaavik, isiginnaatunit oqarpallattoqartaraaq. Atisat takutinneqartut atisanik nutaalianik ilusilersuisartumit allamit europamiuusumit sanaarineqarsinnaalluarput. Ukuali ilusaat qalipaataallu ukiup tulliani tunisaalersussat Kalaallit Nunaata pinngortitarsuata ilusaanit qalipaataanillu isumassarsiaapput.

- Instagramimi (Inuit tamat internetimi quppersagaasa ilaat) qaqqap assinga kusanarluinnartoq nassaaraarput, isumassarsiatsinnullu ilanngullugu. Qalipaatit taakkorpiaat, qaqqap qalipaatai atisaliani tassa takuneqarsinnaapput, Bibi Chemnitz sinnerlugu tusagassiuutinut attaveqaataasoq David Røgilds Sermitsiaq.AG-mut oqarpoq.

- Takutitsinerput ajunngilluinnartumik ingerlavoq, nuanneqaarlu pingajussaa takutitsilluni, Bibi Chemnitz nuannaarluni oqarpoq.

Bibi Chemnitz Kalaallit Nunaanni tunisaqarnerpaasarpoq, Danmarkimili tunisinera aamma ajunngitsumik ingerlavoq. Nunanilu allani Tysklandimi, Italiami, Japanimi, Ruslandimi USAmilu aamma tunisaqartarpoq.