Biathlon: Ukaleq Slettemarkip nunarsuarmi pissartaq ajorsartikkaa
Ukaleq Slettemark sisoraaserluni ooqattaasartunut nunarsuarmi pitsaanerpaanut qanillattungaatsiarpoq. Oqilaniuunnermi Norgemi ingerlanneqartumi pitsaanerit qulit akornannut inissippoq
18-inik ukiulik Ukaleq Slettemark sisoraaserluni ooqattaanermi, inuusuttuni januarimi nunarsuarmi pissartanngorpoq.
Norgemi ippassaq sapaammi inersimasunut unammeqataavoq, pitsaanerillu qulingattut inissilluni, taamaalilluni ajungaasumit Ruslandimeersumit 32-inik ukiulimmit Irina Starykh-imit sekundinik 56-inik arriinnerulluni.
Igeriarneq pitsaalluinnartoq.
- Angusannut tupaallattorujussuuvunga. Suna tamarmi pitsaalluinnarpoq. Igeriarnikka ajunngilluinnarput aamma sisorarfimmi ingerlalluarpunga. Neriuutigilaarnikuuara pitsaanerit 30-it ilaannut inissinnissara, pitsaanerilli qulit iluannut inissinnissara eqqarsaatiginikuunngilaraluunniit. Inersimasut sisoraaserlutik ooqattaasartut nunanit angisuuneersut ajugaakkajuttut ajugaaffigalugit tupinnartorujussuuvoq. Sungiusarluarnikuuvunga tamannalu siuariaatigaara, Ukaleq Slettemark tusagassiuutinut nalunaarummi oqarpoq.
Norskit nunanut allanut unammisartuat nunarsuarmilu pissartaq Synnøve Solemdal unammeqataavoq, Ukaleq Slettemarkimulli ajornartorsiortitsinngilaq.
Ukaleq Slettemarkimi nunarsuarmi pissartamit 15 sekundinik sukkanerulluni apuuppoq.
- Sisoraaserluni ooqattaasarnermi angusaq angisoorujussuuvoq, 18-inimmi ukiulik ullut tamaasa inersimasut akornanni angusarissaarneq ajorpoq, ingammik nunami sisoraaserluni ooqattaasartukitsumeersuugaanni, Kalaallit Nunaanni Biathlonertartut Kattuffianni siulittaasoq Øystein Slettemark erseqqissaavoq.
Nunarsuarmi pissartanngorniuunnermut
IBU Senior Cup ulluni marlunni allani aamma ingerlanneqarpoq. 28 aamma 30 november ingerlanneqarmat Ukaleq Slettemark pitsaanerit 37-attut 16-attullu inissippoq.
Ukaleq Slettemark maanna IBU junior cupimut 22-it inorlugit ukiullit unamminissaannut, Slovenienimi decemberip qeqqani ingerlanneqartussamut sungiusaleruttorpoq. Inuusuttut nunarsuarmi pissartanngorniuunnerannut peqataanissaq januarip naanerani ingerlanneqartussaq anguniarpaa, unamminerni taakkunani ukioqatini 20-it inorlugit ukiullit unammeqatigissavai.