Berthelsen Ilisimatusarfimmi ataqqinaammik doktorinngortinneqarpoq

Ilisimatusarfik tallimassaa ataqqinaammik doktorinngortitsivoq.

Ilisimatusarfiup ukiumoortumik nalliuttorsiornerani rektorip Tina Parsip Christian Berthelsen ataqqinaammik doktorinngortippaa.

Toqqaanermut atatillugu lektori, ph. D. Karen Langgård, Oqaasilerinermut, Atuakkialerinermut Tusagassialerinermullu Immikkoortortameersoq aamma lektori, ph. D. Flemming Nielsen, Upperisarsiornermut Immikkoortortameersoq, Christian Berthelsenimut oqalugiarnerminni oqarput, atuakkialerinerup oqaluttuassartaani suliaqaraangatta tunngaviit maanna atukkavut Christian Berthelsenip pilersissimagai:

- Sullerilluinnassusimigut aamma oqaatsit oqaluttualiat taalliallu eqqarsaatigalugit tappilluinnassutsimigut ilisimatusariaaseq kimittooq qaffassarsimavaa. Ilisimatusariaatsimik taamaattumik pilersitsinermigut tamatsinnut qaffasissumik maligassiuisuuvoq. Ilisimatuutut anersaaqarpoq, sammisat tulleriiaartut arlalissuit piginnaanngorsarfigisimavai, piviusut toqqammavigalugit piginnaanngorsarsimanerup ilaatigut ileqqussaasutut piginnaanereqqusanit akimuisinnaasut inuttaata tamanna aqqutigalugu takutittuartarpaa.

1916-mi inunngortoq Christian Berthelsen Ilinniarfissuarmi ajoqitut ilinniarnerminik naammassereerami Danmarkimi nunatsinniit ilinniartitsisunngortut siulliit ilaattut soraarummeerpoq.

- Christian Berthelsen sulinermi nalaani pingaarutilinnik atorfeqarsimavoq, ilaatigut ukiorpassuarni skoledirektøriusimalluni, piffissallu ingerlanerani kalaalilt atuakkiaannik saqqummersitsisarnermut pingaaruteqarluinnartutut inissisimasimalluni, Ilisimatusarfik allappoq.

Soraarninngornermi kingorna Danmarkimut nuuppoq, Københavns Universitetimilu Institut for Eskimologiimi avataaneersutut ilinniartitsisuusarluni, tassanngaanniillu kalaallit atuakkiortarnerat kalaallillu oqaasii pillugit suliani nangeqqissimallugit.

Tallimassaat
Siusinnerusukkut makku ataqqinaammik doktorinngortinneqarsimapput: Robert Petersen, Michael Hauser, Henrik Wilhjelm aamma Finn Lynge.

Ilisimatusarfimmi ilinniartut sulisullu saniatigut nalliuttorsiornermi makkunanngaanneersut najuupput: Namminersorlutik Oqartussanit aamma Kommuneqarfik Sermersooq, inuussutissarsiornermik sammisaqartut, ilisimatusarfimmi atuisartut qanimullu suleqataasut allat.

Ukiumoortumik nalliuttorsiortoqarneranit Sermitsiaq.AG assinik saqqummiussiumaarpoq