Skip to main content

Benzinkort: Kukkunersiuinermut ataatsimiititaliap Siulittaasup naalakkersuisoqarfia inissippaa

Siulittaasup Naalakkersuisua assiginagu, Kukkunersiuinermut ataatsimiititaliaq isumaqarpoq suliffimmut atatillugu akeqanngitsumik biileqartitaanermi benzinkortip atornerlunneqannginnissaa sipaarnerunissarlu anguniarlugu, malittarisassanik sukaterisoqartariaqartoq.

Suliaq benzinkortimut tunngasoq, Doris J. Jensenip naalakkersuisunit tunuarneranut peqqutaasoq, suli naammasseqqajanngilaq.

Kukkunersiuinermut ataatsimiititaliap isumaliutissiissutaani saqqummeqqammersumi tamanna atuarneqarsinnaavoq.

Tamarmik misissorneqarput

Doris J. Jensenip benzinkortiata atornerlunneqarsimanerata paasineqarnerata kingorna, kukkunersiuinermut ataatsimiititaliap 2014-imiit 2017-mut qinigaaffimmi Naalakkersuisuusut tamakkerlugit misissuiffigingaatsiarsimavaat.

Misissuinermi paasiniarneqarpoq Naalakkersuisut sulinerminnut atatillugu akeqanngitsumik biileqartitaanerminni qanoq atuitigisarsimanersut. Naatsorsuuserisup pisortanit akuerisaasup, Bo Colbep Deloittemeersup, misissuinermini inerniliussai, ataatsimiititaliamut februaarip 16-iani 2018-imili tunniuppai. Doris J. Jensenip benzinkortianik atornerluisoqarsimaneranut tunngasut, tassani umiatsiamut orsersorluni benzinamut atorneqarsimanera pillugu, naatsorsuuserisup taassuma novembarimi 2017-imi aamma misissuiffigaa.

Misissuisitsinerup kingorna, kukkunersiuinermut ataatsimiititaliap nalilersinnaanngorpaa, Doris J. Jensen septembari 2015-imiilli, naalakkersuisunut allanut sanilliullugu ikummatissanik atuinerungaatsiarsimasoq.

Siulittaasup Naalakkersuisua peqataatinneqarpoq

Paasisat taakku aallaavigalugit Kukkunersiuinermut ataatsimiititaliap Siulittaasup Naalakkersuisoqarfia piumaffigaa “akeqanngitsumik atuisumit akileraaruteqarfiusumik biilit pineqaraluartut orsersornermut biilinillu ingerlatsinermut aningaasartuutit suut Namminersorlutik Oqartussanit akilerneqartarnerannut killissamik aalajangersaanissamik isumaliutigineqartut pillugit” isumaliutiginneqqullugu.

Siulittaasup Naalakkersuisoqarfiata akissutaani allaqqavoq, ”atuineq pillugu tunngaviusumik ingasaassinaveersaarnissamik periuseq qulakkeerumallugit” malittarisassat maanna atuuttut naammattut, atuutsinniarnissaallu naammattoq.

Akissut naammanngitsoq

Akissut taanna Kukkunersiuinermut ataatsimiititaliamit naammagineqanngilaq, ataatsimiititaliarlu piumasaqarpoq misissuisoqassasoq, taamaasiornikkut anguniarlugu ”siunissami sipaarniartussaanerup siuarsarneqarnissaa siunertaralugu aammalu piaaraluni piaarinaniluunniit atornerluisoqaratarsinnaanera annikinnerpaaffissaaniitinniarlugu”.

Ataatsimiititaliarmi isumaqarpoq ”kortinik akiliutitut isigineqarsinnaasunik tunniussinermi atuinermilu malittarisassanik erseqqinnerusunik Naalakkersuisut qulakkeerinnissimannginnerat” naammaginanngitsoq.

Upernaakkut ataatsimiilinnginnermi erseqqissaasoqassaaq

Kukkunersiuinermut ataatsimiititaliap piumasaqaataasa pingaaruteqassusaat erseqqissarniarlugu isumaliutissiissutip naggaterpiaani naggasiisoqarpoq:

Maleruagassanik misissuineq ingerlanneqalersoq uppernarsaqqullugu Naalakkersuisut Siulittaasuat ataatsimiititaliamit kaammattorneqarpoq.

Suliaq ataatsimiititaliamit malinnaavigineqassaaq aammalu maleruagassat periutsillu naleqqussarneqarnerat pillugu upernaakkut ataatsimiinnissaq 2019-imi sioqqullugu ilisimatinneqarnissani ataatsimiititaliap naatsorsuutigaa.

Kukkunersiuinermut ataatsimiititaliap Sermitsiaq.AG-mi oktobarip 25-ani allaaserisaq atuarsimavaa, tassani nutaarsiassaqartitsivik ilisimatitsivoq malittarisassat pillugit Aningaasaqarnermut Naalakkersuisoq misissuititsissasoq, tassunga tunngatillugu ataatsimiititaliaq ima ilisimatitsivoq:

Aningaasaqarnermut Naalakkersuisup maleruagassanik misissuititsilersaarluni tamanut oqaatiginninnera ataatsimiititaliamit iluarisimaarneqarpoq. Tamanna sipaarniarnissamut atornerlueratarsinnaanermullu tunngatillugu ataatsimiititaliamit isiginiagassatut ujartorneqartut naleqqussarneqarnissaat siunertaralugu pissasoq ataatsimiititaliamit naatsorsuutigineqarpoq. Tamanna kinguarsaanertaqanngitsumik pissasoq ataatsimiititaliamit erseqqissaatigineqassaaq.

Nunatta Karsiata naatsorsuutaasa aappassaaneerneqarnissaat, taamatullu Kukkunersiuinermut ataatsimiititaliap isumaliutissiissutaa Inatsisartuni aqagu marlunngornermi novembarip 27-ani oqaluuserineqassaaq.​​​​​​​

Benzinkortimut suliamut tunngasut uani atuakkit:

Sermitsiaq.AG-p allaaserisai uani takukkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER