Benzinkortimut suliami Thomsenip IA aamma PN isornartorsiorpai
Doris J. Jensenip benzinkortiata atornerlunneqarneranut suliamut tunngatillugu suliap ingerlanera Niels Thomsenimit paasiuminaatsinneqarpoq. Politikkikkut ingerlatsinermi allannguisoqartariaqartoq ujartorpaa.
- Doris J. Jensenip benzinkortiata atornerlunneqarsimanera 2017-mi Naalakkersuisooqataasut paasitinneqaqqaarmata allatut iliuuseqartoqarsimasinnaagaluarpoq, Demokraatini siulittaasoq Niels Thomsen Sermitsiaq.AG-mut oqarpoq. Inuit Ataqatigiinnut Partii Naleqqamullu isornartorsiuivoq.
- Paasissutissat saqqummiunneqarnissaat Inuit Ataqatigiinnit aamma Partii Naleqqamit sooq piumasaqartitsisoqarsimannginnera paasisinnaanngilara. Illuatungiliuttunngoreeramik aatsaat qisuariaateqarput, piffissaagallartillugu iliuuseqarsimasussaagaluarput, Niels Thomsen oqarpoq.
- Taamatut politikkikkut ingerlariuseqartoqarnera allanngortikkusuppara, Niels Thomsen isumaqarpoq.
Taamaattumik pitsaanerusunik sinaakkusersuisoqarnissaa ujartorpaa.
Benzinkortit pillugit malittarisassaqanngitsoq Aningaasaqarnermut Sulisoqarnermullu Aqutsisoqarfimmi pisortaq Lise Lennert Olsen Sermitsiaq.AG-mut ullumi oqarpoq.
Deloittep misissuereernerata kingorna tamanna qaqilerneqassasoq ilisimatitsissutigaa.