Benziinamut akiliut politikkikkut sivisuumik suliaqarnermik aporfeqartitsivoq
Doris J. Jensenip ukiorpassuarni atorfiit nuimasut atorfigisarpai; kisianni partiimi siulittaasunngunngilaq.
Doris J. Jensenip ippassaq tatiginnikkunnaarnermik tasititsinissaq sioqqullugu peqqissutsimut, isumaginninnermut inatsisinillu atuutsitsinermut naalakkersuisutut tunuarluni nalunaarutigigamiuk, politikkikkut patajaatsumik allanngujaatsumillu sulinera allamut saaqattaariarluni tunuariasaarpoq.
Naak Doris J. Jensen – imaluunniit amerlanerit Dorisiinnarmik taasagaat – suli 40-nik ukioqalinngikkaluarluni, nuimasunik naalakkersuisuuffeqartarluni naalakkersuinikkut suliaqarsimanini kingumut qiviarsinnaavaa. Qinersinerpassuarni qinigassanngortittarpoq, najukkami, nuna tamakkerlugu aamma Folketingimut.
24-nik ukioqarluni qinigaasoq
Inuusuttuulluni Aasianni Siumup inuusuttaanni ilaasortanngorpoq, 16-inillu ukioqarluni najukkami immikkoortortami siulittaasunngorpoq. Siumumilu aamma siulersuisunut ilaasortanngorpoq, kingornalu aamma Siumup Inuusuttaanni nuna tamakkerlugu siulittaasunngorluni.
2002-mi 24-inik ukioqarluni Inatsisartunut qinigaavoq. Ukiut pingasuinnaat qaangiuttut Doris J. Jensenip naalakkersuisutut atuuffik siulleq pissarsiaraa, kultureqarnermut, ilinniartitaanermut, ilisimatusarnermut ilageeqarnermullu naalakkersuisunngorluni.
2007-imi Folketingimut qinigassanngortilluni angusarissaarami atorfeqarnermini siuariarpoq – Siumumi taamaallaat Lars-Emil Johansenimit anguneqarluni. 2009-mi tunuarmat, Christiansborgimi atorfia Doris J. Jensenip atorfigilerpaa. 2011-mi nammineerluni Folketingimut qinigaavoq, ukiullu sisamat siuliini Lars-Emil Johansenip taaguunneqarnera qaangerpaa – 5.621-nit taaguunneqarpoq, taanna 3.584-nit taaguunneqartoq.
2014-imi siulittaasunngorniunneq
Siumumi qinersisartut akornanni nuannarineqarluaraluarluni, nittartakkatigut oqaaseqartarfinni taamaattuaannanngilaq, ilaatigut takujuminaatsunik aterusersorneqartarluni.
Doris J. Jensenip aamma kommunimi qinikkatut sulineq malersorpaa, 2009-milu Kommuneqarfik Sermersuumi borgmesterimut tullersortaavoq.
Aleqa Hammond 2014-imi Siumumi siulittaasutut bilagit pillugit mamianartuliornerup kingorna tunuartariaqalermat, Doris J. Jensen siulittaasunngorniunnermut ilannguppoq, kisianni taperserneqanngilaq. Taanna Nick Nielsenilu marluullutik marluinnarnit taaneqarput. Kim Kielsen 44-nit taaneqarluni qinigaalluarpoq, Lars-Emil Johansen 17-nit taaguunneqartoq.
Kisianni Kim Kielsen unammillernikuugaluarlugu taakku akornanni akerleriittoqanngilaq. Kim Kielsenip qitiusumik atuuffinnut inissittaqattaartarpaa, Doris J. Jensenillu suliassat suliakkiunneqartut pisussaassutsimik ilaginnaajumanani suliarinninniartarpoq. 2014-imi qinersinerup kingorna peqqissutsimut aamma nunat avannarliit suleqatigiinnerannut naalakkersuisututut toqqarneqarpoq, Folketingiillu sulinngiffeqarpoq.
Nick Nielsen Folketingimit anisussanngormat
Kisianni ukioq ataaseq qaangiutiinnartoq Kim Kielsenoå politikkikkut iliuuseqariataarniarnermi atorfissaqartilerpaa. Doris J. Jensenip Folketingimi sinniisaa Nick Nielsen, Pituffimmi kiffartuussinissamut isumaqatigiissummik ajornartorsiuteqarneranik Naalakkersuisut ilisimannissimasut oqaluttarfimmit oqarnermini ajoqusiivoq. Kim Kielsenip tamanna narrujuummissutigingaaramiuk Nick Nielsen Folketingimit ilaasortaajunnaarsikkusuppaa. Doris J. Jensenip ukiup naalernerani Folketingimut qinersisoqarnissaata tungaanut ilaasortaaffini uterfigineratigut tamanna pisinnaasimavoq.
Tamatuma kingorna peqqissutsimut naalakkersuisuuffini uterfigeqqippaa. Ilinniartitaanermut, kultureqarnermut, ilisimatusarnermut ilageeqarnermullu naalakkersuisuullatsiarnermi kingorna, upernaaq qinersinerup kingorna peqqissutsimut naalakkersuisunngoqqippoq.
Naalakkersuisoqatigiit pilersinneqarneranni kingullermi politikkikkut suliassaqarfiit oqimaatsut marluk akisussaaffigilerpai, tassa peqqissutsimut aamma isumaginninnermut naalakkersuisoqarfiit. Kisianni benziinamut akiliut pillugu suliaq aallartimmat, atorfik tamanna suliffigerpianngilaa.
Qaammatip naalernerani Doris J. Jensen 4-liinermini ukiorpassuarni aatsaat siullermik Inatsisartuni ilaasortaannartut sulissaaq. Tassanngaanniik politikkikkut suliaqarnini iluarsinissaanut sulissuteqarnissaminut periarfissaqarpoq.
Najoqqutat: Naalakkersuisut, valg.gl, Wikipedia, Sermitsiaq.AG.
Suliaq tamaat una linki aqqutigalugu paasisaqarfigisinnaavat.