Benziinamut akiliummik suliaq: Kielsen aamma Doris oqassaanngitsorujussuit
Naalakkersuisut siulittaasuat Kim Kielsen, benziinamut akiliutip atornerlunneqarsimanera pillugu suliami inuttaq pingaarneq assigalugu oqassaanngilaq.
Kim Kielsen suliaq pillugu oqaaseqaqqikkusunngilaq, kisianni allatsini aqqutigalugu Doris J. Jensen ‘’kortimik benzinasiniutissamik atornerluisoqarsimaneranut atatillugu pissusissamisoortumik qisuariaateqarsimasoq’’ isumaqarnini oqariartuutigaa.
Kukkunersiuinermut ataatsimiititaliaq utaqqigaa
Taassuma maanna kukkunersiuinermut ataatsimiititaliap misissuinermit aalangiinera utaqqiniarlugu, KNR-imut ilisimatitsissutigineqarpoq.
Inuttaq pingaarneq, Doris J. Jensen, benziinamut akiliummik kodianillu ‘’inummit inoqutigiinneersuunngitsumit’’ atornerlunneqartumik biiliniititsisoq, suliaq pillugu aamma oqaaseqaqqikkusunngilaq, KNR taama ilisimatitsivoq.
Naalakkersuisunut, Deloittemut aamma politiinut paasissutissat tamaasa tunniussimallugit, taanna isumaqarpoq. Tamanna tunngavigalugu suliaq pillugu KNR-imit apersorneqarusussimanngilaq.