Skip to main content

Bentiaraq qinersinerup kingorna siulittaasumik nutaamik piumasaqarpoq

Atassutip folketingimut qinigassanngortitaa Bentiaraq Ottosen, ippassaani qinersinermi ingerlanerlunnerup kingorna partiimi annertuumik allannguisoqarnissaanik piumasaqarpoq. - Partii nikanartunnguorpugut

Bentiaraq Ottosenip (A) ippassaani pingasunngornermi folketingimut qinersisoqarnerani partiip angusaa naammaginngilluinnarpaa.

Ukiut sisamat matuma siorna qinersinermut sanilliullugu partii 2,1 procentimik kinguariarpoq, taannalu naapertorlugu partii maanna aaqqissuusseqqinnissamik aallartitsisariaqarpoq.

- Pakatsisorujussuuvunga. Parteerput nikanartunngoqqavoq. Kinguariangaatsiarpugut, maannakkullu partiimi isummagut ersersartariaqarpagu. Annertuumik allannguisoqartariaqarpoq, Bentiaraq Ottosen, Sermitsiaq.AG-mut taama oqarpoq. Taanna qinersinermi 810-nik taaguunneqarpoq.

Siulittaasumik nutaamik ujartuisoq

Partii annertuumik suliassaqartoq, taanna oqarpoq.

- Maanna siulittaasup partiip isummersuutaanik ersarissaanissaanut piffissanngorpoq. Ukiuni kingullerni partii kinguariartorpoq, ersarinnginnerput pissutaalluni. Partii maanna nammineq politikkikkut isummersuutini saqqummiuttariaqarpai, partiit allat isumaat maliinnarnagit, taanna oqarpoq, nangillunilu:

- Siulersuisut aalajangigassaraa, siulittaasumik nutaamik nassaartoqassanersoq. Kisianni uanga isumaqarpunga siulittaasumik nutaamik inuusuttumik, partiimik ingerlatitseqqittussamik nassaartoqartariaqartoq. Siverth K. Heilmann massakkut tunuarnissaa oqaatiginngilara, taannami partiimi inuusuttunut uagutsinnut ikiuulluarnikooqaaq. Kisianni partiimi ataatsimiittarnerit akuttuallaarput, sinerissami immikkoortoqarfinni pisoqanngilaq, partiilu aamma kiinnanik nutaanik katersinermut pitsaavallaarsimanngilaq.

Iluareqqusaarluni qineqqusaarneq

Bentiaraq Ottosenip partiit allat aamma isornartorsiorpai.

- Iluareqqusaarluni qineqqusaartoqarpoq, tamannalu qinersisartunik pissarsiffiuvoq. Partiit isummersuutigut tigooqqarpaat, allanngulaartarlugillu. Assersuutigalugu sakkutuujusussaanermik pilersitsisoqarnissaanik siunnersuuterput Siumup tiguaa. Isumassarsiarput Siumup tillippaa. Kisianni immaqa uagut partiimi isummersuutitta saqqummiunnissaannut pikkorippallaarsimanngilagut, taamaattumilu maanna allannguisoqartariaqapoq, Bentiaraq Ottosen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER