Bay: Inuusuttut tusaamaneqarnerminnit pitsaanerujussuupput
Inuusuttut pinerluttarnerisa appariartupiloornerat siunissamut neriuuteqalersitsivoq - aamma nakuusertarnermut atornerluisarnermullu tunngatillugu. Politimesteri Bjørn Tegner Bay taama isumaqarpoq.
Bjørn Tegner Bay Kalaallit Nunaanni politimesteritut atorfeqarnermini neriuuteqarnermik oqariartuuteqarpallaarneq ajorpoq. Ernumassutit, aarlerisaarutit aamma uparuaanerit oqariartuutiginerusarpai.
Kisianni inuusuttut pinerluttarnerannut tunngatillugu nipi oqinnerulertarpoq.
- Inuusuttut pinerluttarneranni ineriartorneq isigigaanni isumalluartuunnginnerup tigumminnaarnissaa ajornakusoorpoq.
Politiip misilittagartuup isumalluartuunnginneranik tigumminninnissamut ajornakusoortitsisoq tassaavoq, politiit ukiumoortumik kisitsisaataat kingulliit, tassani inuusuttut akornanni pinerluttarneq ukiut tallimat ingerlanerinnaanni affangajammik appariarfiusimasoq takuneqarsinnaavoq. Pigisanik tillinniarluni pinerluttarnermut tunngatillugu 2014-imut sanilliullugu pingajorarterutaa sinnilaaginnarpaa.
- Inuusuttut 18-inik ukioqalernissaasa tungaanut pinerlunnaveersaartissinnaagutsigit, tamatuma kingorna aallartinnginnissaannut periarfissaqarluartoq uanga oqaatigisarpara.
- Taamatut oqaaseqarsinnaaneninnut pissutaavoq, kingusinnerusukkut pinerluuteqartartut pinerlussinnaanermut ukiup killigititap angunninneranit politiini ilisimariikkajuttaratsigit.
Inunnut ulorianaatilimmik pinerlunnerit ikileriartut
Nakuuserluni pinerluuteqarnerit aamma kinguaassiutitigut kannguttaatsuliornerit qiviarutsigit, ikileriarnerat annertuallaanngilaq. Kisianni 2014-imili taakkunani amerlassusaat pingajorarterummik ikileriarput. Piffissami peqatigisaani taakkunani marlunni katillugit ikileriartoqarneranik takusassaqannginneranik ataatsimoortinneqassapput.
- Nakuusernermut aamma kinguaassiutitigut kannguttaatsuliornernut inuusuttunit pinerluutigineqartunut tunngatillugu, inuusuttut sinnerlugit isumalluartorujussuuvunga.
Kisianni inuusuttut akornanni inunnut ulorianaatilimmik pinerluttarnerit ikileriaraluartut, suli malunnaatilimmik appariarnissaat anguniarneqartariaqartoq, Bjørn Tegner Bayip uparuarpaa.
- Kisianni piffissap ilaani inuusuttut ajornartorsiutaat oqaluuserineqaraangata, eqqortoq takuneq ajorparput. Inuusuttut pinerluttarnerat appariarteqqinnerusinnaagutsigu, taava siunissap qaamanerusutut isiginissaanut tunngavissaqarluassaanga.
- Inuusuttut pinerluttarnerat appariartuinnassapput, taava piffissaq ungasinnerusoq eqqarsaatigalugu ataatsimut isigalugu sunniuteqassaaq, Bjørn Tegner Bay oqarpoq, taannalu inuusuttut pinerluuteqartanngikkunik, inersimasunngornerminni aamma taamaaliortarnissaaq qaqutigoornerussasoq oqaatigalugu.