Da Bartali Crew nersornaaserneqarnissamut innersuunneqarpoq

Nipilersortartoq nersornaaserneqaqqammersoq Hans-Ole Amossen nersornaaserneqaqqissinnaavoq. Nunat Avannarliit Siunnersuisoqatigiivisa nipilersortartunut nersornaasiuttagaannut innersuunneqarpoq

Da Bartali Crewimi nipilersortartoq Hans-Ole Amossen nersornaaserneqarnissamut innersuunneqarpoq

Nipilersoqatigiinni nuannarineqarluartuni Da Bartali Crewimi nipilersortartoq, Hans-Ole Amossen, nersornaaserneqaqqissinnaavoq.

Kodap nersornaasiuttagaanut isumalluarnartumut nersornaammut Hans-Ole Amossen nersornaaserneqarpoq ukioq manna, maannalu Nunat Avannarliit Siunnersuisoqatigiivisa nipilersortartunut nersornaasiuttagaannut innersuunneqarluni.

- Nersornaammut taama isumaqartigisumut innersuunneqarnera maanna oqaasertaleruminaatsippara, 33-nik ukiulik nipilersortartoq Sermitsiaq.AG-mut oqarpoq.

Ajugaanissamut naatsorsuuteqanngilaq

Nipilersoriaasaa assigiinngiiaartutut oqaatigineqartarpoq, atortorissaarutit elektroniskiusut nipilersornermi atortarpai kiisalu tusarnaartitsinerni rappertartut assigiinngitsut nipilersoqatigisareerlugit.

- Nersornaammut ajugaanissara ilimaginngilara, innersuunneqartummi allat pikkorissorujussuupput. Taamaattoq tulluusimaarutigilaarpara nipilersortarnikka nunani allani maluginiarneqarsimammata.

- Nersornaat Stockholmimi tunniunneqalerpat peqataassaagut. Peqataanissarput qilanaaraarput, Hans-Ole Amossen oqarpoq.

Nersornaammut innersuunneqartut 13-iupput, ajugaasoq 350.000 koruuninik akissarsitinneqassaaq.

Hans-Ole Amossenip AG-imit apersorneqarnera atuarneqarsinnaavoq. Aviisi uani pisiariuk:

Powered by Labrador CMS