Skip to main content

Banknordkip nunatsinni sinneqartoorutai amerliarporput

Banknordikip ukiumi kvartalini siullerni pingasuni angusa 128 millioner koruuniupput, 2013-imi taamaasinerani angusat 93 millioner koruuniusimallutik. Tassa angusat 37 procentimik qaffariarlutik. Kalaallit Nunaanni siuariaat 40 procentiuvoq, aningaaserivik nalunaarpoq

Banknordikip 2014-imi kvartalit pingajuannut naatsorsuutaasa takutippaat pingaartumik Danmarkimi anningaaseriviup ingerlatsinerani sillimmatinillu ingerlataani siuariartoqarpoq, aningaaseriviup savalimmiuni ingerlatsinera taarsigassarsiussanut erniatigut unammillernikkut suli tatineqartoq, tamanna aningaaseriviup kvartalit pingajuannut angusaminik tusagassiorfinnut nalunaarutaani takuneqarsinnaavoq.

Kalaallit Nunaanni Banknordik 2014-imi kvartalini siullerni pingasuni 9,5 millioner koruuninik sinneqartooruteqarpoq, tassa 2013-imut sanilliullugu 40 procentimik siuariarluni. Kvartalit pingajuanni Banknordikip Kalaallit Nunaanni ingerlatsineq nukittorsarsimavaa, ilaatigut inuussutissarisiornermi siunnersortinik mislittagalinnik, aammalu aningaaserivimmiutut ilinniartunik nutaanik atorfinitsitsinermigut. Tamatuma saniatigut kvartalit pingajuat nunatsinni immikkoortoqarfiup pisortartaavata Jón Brekku-p, sulinerani kvartali siulliuvoq, taanna 2014-imi juunimi atorfinitsinneqarsimammat.

Banknordikip ukioq manna kvartalit pingajuanni angusai 53 millioner koruuniupput, 2013-imi kvartalit aappaanni 44 millioner koruuniusimallutik, pingajuannilu 30 millioner koruuniusimallutik. Ukiumi kvartalini siullerni pingasuni ingerlatsinermni angusat tamarmiusut 128 millioner koruuniupput, siorna 93 millioner koruuniusimallutik, tassa 73%-imik amerleriarlutik, tusagassiorfinnut nalunaarummi allassimavoq.

Ukiumi qaammatini siullerni qulingiluani ingerlatsinermi isertitat tamarmiusut 596 millioner koruuniusimapput, siorna piffissami tassani 640 millioner koruuniusimallutik, tassa 44 millioner koruuninik ikileriarlutik pingaartumik pissutigalugu Savalimmiuni taarsigassarsisitsinermut erniat appariarnerat pissutigalugu. Tamanna peqatigalugu annertuumik pisariillisaasimanerit pissutigalugit aningaasartuutit 27 millioner koruuninik akileriartinneqarsimapput. Tamanna, aammalu taarsigassarsiussanut annikilliliissutit affai sinnerlugit annikillisinneqarsimanerat pissutigalugu, suliffeqarfissuup angusai akileraarutit suli ilanngaatiginagit 134 millioner koruuninut amerleriarsimapput, 2013-imi qaammatini siullerni qulingiluani 124 millioner koruuniusimallutik - aali aningaasat nalingisa iluarsineqarnerat siornarnit 15 millioner koruuninik annikinnerusunik iserititsissutaasiasoq. Angusat affai Savalimmiut avataanni aningaaserivimmik ingerlatsinikkut pissarsiarineqarput.

– Nuannerpoq takullugu sammisatigut siuariartoqarsimanera, pingaartumik Danmarkimi, aammalu nuannerpoq takullugu ineriartorneq ukiup aallartinneraqnit ilimagisamit pitsaanerusumik ingerlasimavoq, tusagassiorfinnut nalunaarut naapertorlugu pisortaaneq Janus Petersen oqarpoq.

2014-imut naatsorsuutigisat iluarsineqarput

Banknordikip qullersaasa maanna 2014-imut naatsorsuutigilerpaat nalikilliliinerit, ataasiaannarluni akilgassat, aningaasat nalingisa ilaursinerat akileraarutillu peereerlugit 2014-imut angusat 220-240 milllioner koruuniussasut. Ukiup aallartinnerani naatsorsuutigineqarsimagaluarpoq angusat 200-240 millioner koruuniussasut. Ukiumi kvartalimni siullerni pingasuni angusat 185 millioner koruuniupput.

2013-imi kvartalini siullerni pingasuni taarsigassarsiussanut annikilliliissutit (suut tamaasa peereerlugit) 56 millioner koruuniusimapput, naatsorsuutigineqarporlu taakkua 2014-imi ukiup siulianit, 147 millioner koruuniusimasunit, appasinnerungaatsiassasut.

Siunissami aningaasarsiornerup ineriartortinnissaanik ilimagisat pissutissamisoortumik nalorninartoqarlutillu ulorianartortaqarput, taamaattumillu angusassatut ilimagisat naatsorsuutigisanit allaanerusinnaapput, tusagassiorfinnut nalunaarummi allassimavoq.

Akiliisinnaassuseqarneq suli pitsaaqaaq

Kvartalit nikinneranni akiliisinnaassuseqarpoq 14,1 procentiummat Bank Nordik 8,8 procentimik aningaasaateqarnissamik piumasaqaat appasissoq 5,3 procentimik qaangersimavaa, tassuunakkullu aningaaseriviup annaasaqaratarsinnaanera takuneqarsinnaavoq. Piffissami sinneqartoorutit ilanngullugit akiliisinnaassuseqarneq 15 procentinngorpoq.

Savalimmiuni aningaaserivinnut immikkut pingaarutilinnut (SIFI) aamma aningaasaatit matussuteqarnissaannut malittarisassat nutaat (CRD IV) 2015-ip aaffaani siullerni 2016-imiluunniit atuutilersinnissaannut atatillugu naatsorsuutigineqarpoq aningaaserivimmut aningaasaqarnissamik piumasaqaat 2019-imi ukiup naaneraniit 14 procentimut qaffanneqassasoq. Taamaasilluni aningaasaateqarnissamik piumasaaatinngortussaq aningaaseriviup naammassereerpaa.

Aamma akiliisinnaassuseqarnissamut piumasaqaatit eqqarsaatigakugit BankNordik kvartalit pingajuata naanerani matussutissaqarluarpoq, tassa inatsimmit piumasaqaammit akiliisinnaassuseqarneq 2,7 procenteriaammik amerlassuseqarmat, tusagassiorfinnut nalunaarummi allassimavoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER