BankNordik: Kalaallit Nunaanni taarsigassarsisitsinerit annertuut
Banknordik nammineq isummani malillugu 2019-imut naatsosuutit naammaginarluartut ukiumilu angusat naatsorsuutigisatut pitsaalluinnartut pillugit saqqummiusivoq. Ukioq mannamulli tunngatillugu angusat affaannaanissaat naatsorsuutigineqarpoq
Sullitat eqeersimaarnerat aamma akitsuutit sillimmasiinertigullu isertitat qaffakkiartortut BankNordik ukiup siuliani 323 millioner koruuninik angusaqarsimaneranut sanilliullugu akileraarutit suli peernagit 260 millioner koruuninik angusaqarsimavoq. Aningaaserivik Kalaallit Nunaanni annertuunik taarsigassarsisitsisimavoq.
- Ukiumi taarsigassarsiarititanik appartitsinernik utertitsivugut, tamanna aningaasaqarnikkut ineriartorluarnitsinnut taarsigassarsisitsisarnittalu pitsaassusaanut takussutissaavoq, BankNordimimi pisortaaneq Árni Ellefsen tusagassiorfinnut nalunaaruteqarnemi oqarpoq.
Ingerlatsinermi angusat allannguuteqanngitsut
Aningaaseriviup ingerlatsinermi angusai 2018-imisulli 289 millioner koruuniupput, aningaaserivimmiillu qitiusutut kisitsisit uku saqqummiunneqarput:
Ilanngaatissat ilanngaatigeerlugit erniatigut isertitat, appasinnerusumik erniaqartitsineq pissutigalugu ukiup siulianut sanilliullugu 7 mio. koruuninik appariarput.
Akitsuutitigut iluanaarutitigullu isertitat 2019-imi 17 mio. koruuninik amerleriarput, sullitat eqeersimaarnerulersimanerisa malitsigisaannik.
Sillimmasiisarnikkut isertitat 2018-imut sanilliullugu 2019-imi 9 mio. koruunik qaffapput.
Ingerlatsinermi aningaasartuutit 16 mio. koruuninik amerleriarlutik 472 mio. koruuniupput, nalinginnaasumik aningaasartuutit qaffannerisa it-mullu aningaasartuuteqarnerulernerup malitsigisaannik.
BankNordikip 2019-imi appartitat utertitai 105 mio. koruuniupput, 2018-imi 111 mio. koruuniullutik.
Aningaaseriviup 2020-mut ilimagisai pitsaarpasippallaanngillat, tassa naatsorsuutigineqarmat ilanngaatissat ilanngaatigereerlugit 100 millioniniit 150 millioner koruuninut angusaqassangagami, 2019-imi naatsorsuutit 207 millioner koruuninik inerneqartunut sanilliullugu.
Aningaaseriviulli erseqqissaatigaa:
- Naatsorsuutigisat qularnartortaqarput, ilaatigullu aningaasaqarnikkut pissutsit, taarsigassarsianik appaanerit kiisalu aningaasat nalingannik nalimmassaanerit apeqqutaallutik.
Peqatigitillugu aningaaseriviup aningaaqarnikkut anguniakkani naleqqussarsimavai. Ilaatigut siunissami anguniarneqarniarpoq, akileraarutit peereerlugit 6 – 8 procentinik nammineq aningaasaatinik ernialersuisarnissaq, 2019-imi angusani 10,1 procentimik appassinnerusunik.
Kalaallit Nunaanni taarsigassarsisitsinerit annertuut
Aningaaseriviup Kalaallit Nunaanni taarsigassarsisitsisarnera qiviaraanni, taarsigassarsiaritinneqarsimasut qaffariarujussuarsimapput. BankNordik taamaalilluni 795 millioner koruuninik taarsigassarsisitsisimavoq, ukiup siuliani taarsigassarsiaritissimasai 597 millioner koruuniusimallutik. 33 procentit nalingannut taarsigassarsiarititat qaffassimallutik, tamannalu Kalaallit Nunaanni aningaasaqarnikkut ingerlatsinerup qaffasissusaanut takussutissaavoq.