BankNordikip ukiup naanissaanut inerniliussassatut naatsorsuutini atorunnaarsippai
Coronavirus pissutigalugu pissutsit allanngorluinnarsimammata BankNordik nalunaarpoq ukiup naaneranut aningaaseriviup inerniliussassatut naatsorsuutini atorunnaarsikkallarlugit, taamatullu ukiumoortumik ataatsimeersuarnissaq kinguartillugu.
Nunatsinni coronavirusimik tunillatsinnissamut aarlerisoqalernerata kingunerisaanik BankNordicip ukiumut angusassatut naatsorsuutini maannamut nalunaarutigisinnaanngilai.
– Qularnartoqangaatsiarnera pissutigalugu BankNordikip siulersuisuisa ukiumut aningaasanut tunngatillugu naatsorsuutigisatik, tassa 100-150 milliuunit koruuninut tagginneqarsimasut, atorunnaarsissallugit aalajangerput, tusagassiutinut nalunaarummi ilisimatitsissutigineqarpoq.
Aningaaseriviup erseqqissarpaa, BankNordikip suliai isertitaalu, nalinut nalimmassarnerit sioqqullugit, qaammatini siullerni naammagisimaarnartuusut, aningaaserivissuullu aningaasaatai akiliisinnaassusaalu qajannaalluinnartumik inissisimasut.
BankNordikip naatsorsuutigaa aningaaseriviup ukiumi qaammatit pingasut siulliit angusanut nalunaarusiaani aprilip 30-ani saqqummersussami, ukiumut aningaasanut naatsorsuutit nutartersimasut saqqummiussinnaajumaarlugit.
Ataatsimeersuarnissaq kinguartinneqarpoq
- Aningaaserivik aalajangerpoq nalinginnaasumik ataatsimeersuarnissaq, martsip 26-ani pisussaagaluartoq, taamaatissallugu. COVID-19 pissutigalugu pisut aalaakkaanerulerpata immikkut ittumik ataatsimeersuarnissamut aggersaasoqarumaarpoq, tusagassiutinut nalunaarutigineqarpoq.
Ataatsimeersuarnermi siulersuisuni siulittaasumik toqqaasoqartussaagaluarpoq, Stine Bosse, siulittaasuujunnaassalluni nalunaarnikuummat.