Aningaaseriviit
BankNordikimi siuariarneq
Kalaallit Nunaanni ingammik ingerlalluartoqarpoq, ukiup affaanut angusaani tamanna takuneqarsinnaavoq
BankNordikimi ukiup affaanut naatsorsuutit inernerat appartitsinerit, akileraarutit, nalilinnillu naleqqussaanerit sioqqullugit 97 millionit koruuniuvoq, taamaammat bankip 2016-imut naatsorsuutai annikitsumik qaffariaateqarput.
Aningaaserivik tusagassiuutinut nalunaarummi ilisimatitsivoq.
Atuaruk: Bank Nordik annertuumik iluanaaruteqartoq
Siuariarneq
Siuariarnerup annertunersaa Kalaallit Nunaanni pivoq, tassani isertitat qaffariarmata aningaasartuutillu appariarlutik.
- Ukioq 2016-imi ukiup affaa siulleq BankNordikimut ingerlalluarfiuvoq, maannalu naatsorsuutigaarput 2016-imi ingerlatsinerup inernera appartitsinerit sioqqullugit 160-190 millionit koruunit nalaaniissasoq, Árni Ellefsen, BankNordikimi pisortaaneq oqarpoq.
- Danmarkimi inuussutissarsiuteqartunik sullissaqarnitta atorunnaarsinneqarnera pilersaarutit malillugit ingerlavoq, maannalu Islandimi sillimmasiisarfiup Vørðurip tunineqarnissaanut Islandimi unammilleqatigiinnermut oqartussaasunit akuersissummik inaarutaasumik tunineqarnissarput kisiat amigaatigaarput, tamanna pereerpat nuussineq inaarneqarsinnaassaaq, taanna oqarpoq.
Ingerlatsineq pitsaanerusoq
Kalaallit Nunaanni immikkoortortaqarfinni qaammatini siullerni arfinilinni ingerlatsinerup inernera siorna piffissamut tassunga sanilliullugu 2 millionit koruuninik siuariarnermik takutitsivoq.
Ingerlatsinermit isertitat 1 millionit koruuninik qaffariarsimapput, ingerlatsinermilu aningaasartuutit piffissami tassani 1 million koruuninik appariarsimallutik.
- Naammagisimaarutigalugu oqaatigisinnaavarput Kalaallit Nunaanni suliffeqarfipput ukioq manna qaammatini siullerni arfinilinni siuariarnermik ersersitsimmat, tamannalu ukiuni aggersuni Kalaallit Nunaata niuerfiani anguniakkatsinnut ilaavoq, Árni Ellefsen oqarpoq.