BankNordik utoqqalinersianut katersanik aqutsissaaq

BankNordikimi pisortaanerup Árni Ellefsenip naammagisimaarluinnarpaa, suliffeqarfiit 200-nik amerlanerusut, soraarnerussutisiaqalernissamut aningaasaateqarfimmut attuumassuteqartut, soraarnerussutisiassanik katersanut akiliutigisartagaannik aningaaserivik aqutsisussatut SISA-mit toqqarneqarsimanera.

- Aningaasartuutit qaffarujussuariataannginnissaat SISA-mi pingaartipparput. Siornatigut pensionimut akiliutinik ingerlatseriaaserisimasatsinni aningaasartuutit qaffariapiloornerat paasigatsigu allamik periarfissarsiortariaqarsimavugut,” Søren Schock Petersen, SISA-mi pisortaaneq oqarpoq, nangillunilu:

Periuseq nutaaq

- Tassunga atatillugu BankNordik akiliinernik taakkuninnga ingerlatseriaasissamik nutaarluinnarmik siunnersorpaatigut, nutaaliorlutik eqaannerusumik periuseqarnerat aqqutigalugu maanna akikinnerusumik pitsaanerusumillu sullinneqalerpugut.

Michael Linfos, SISA-mi tuniniaanermi pisortaq ilisimatitsilluni oqarpoq: ”Isumaqatigiissusiaq nutaaq atorlugu sulisitsisut sullitamik pensionissamut tapiissutitut akiliutaat ajornaannerusumik ingerlassinnaalerpaat, aammattaarlu akiliinerit SISA-mut malinnaavigiuminarnerussallutik”.

Aningaaseriviup SISA-llu isumaqatigiissusiaat pissutaalluni pensionissamut tapiissutit akiliutigineqartartut ukiumut 200 mio. kr.-t sinnerlugit nalillit ingerlanneqarnerat aningaasartuutitakinnerulissaaq.

Suliassaq annertooq

Aqutsinissamik isumaqatigiissut nutaaq 2019-imi apriilip aallaqqaataani atuutilissaaq, ukioq mannalu novembarip qaammataata naanerani SISA-mut akiliutissat tamarmik Banknordik aqqutigalugu akilerneqartalissapput.

- Sullissinermut nutaamut ikaarsaarneq uatsinnut sulisitsisunullu ajornaatsuinnaanngilaq, taamaattorli SISA-mut iluaqutissarpassuaqarpoq,” Pâviâraq Heilmann, SISA-mi allaffeqarfiup pisortaa oqarpoq. Isumaqatigiissut SISA-mi ilaasortat atugaannut allannguuteqartitsissanngilaq.