BankNordik nutaamik pisortaanertaarpoq
BankNordikip siulersuisuisa ullumi nalunaarutigaat Árni Ellefsenimut taarsiullugu Turið F. Arge pisortaaninngussasoq, Heini Thomsen-lu ingerlatseqatigiiffimmi pisortanngussasoq.
Turið F. Arge BankNordik-imi pisortaaninngorpoq.
Tamanna bankip tusagassiutinut nalunaarutigaa.
- Árni Ellefsen apriilimi pisortaanertut atorfimminit soraarniuteqarluni nalunaarmat BankNordikip siulersuisuisa ingerlatseqatigiiffiup pisortassaanik ujartuineq aallartippaat. Ullumi BankNordikip nuannaarutigalugu nalunaarutigisinnaavaa ingerlatseqatigiiffiup pisortaqarfianiittut tassaalermata Árni Ellefsen, pisortaaneq, Turið F. Arge, pisortaq, kiisalu Heini Thomsen pisortaq, BankNordik allappoq.
BankNordikimi pisortat nikinnerisa ingerlalluarnissaat anguniarlugu Árni Ellefsen piffissami killilimmi pisortaanertut ingerlaannarallassaaq, kingornalu
Turið F. Arge-ip aqutsineq nangissavaa.
Ukiorpassuarni suleqataasoq
Turið F. Arge 2007-imili BankNordikimi atorfeqarsimavoq, tamaaniinnerminilu ingerlatseqatigiiffiup siulersorneqarnerani assigiinngitsunik atuuffeqarsimalluni, kingullertigut forretningsdirektøriulluni. Ilinniagaraa cand.merc.aud. aammalu Executive MBA naammassisimallugu. 2015-imili ingerlatseqatigiiffiup siulersorneqarnerani ilaasimavoq, ingerlatseqatigiiffiullu ineriartorluarneranut sunniuteqaqataangaatsiarsimalluni, ilisimatitsissutigineqarpoq.
Atorfimminiilaarallassasoq
Heini Thomsen statsaut. revisoritut ilinniarsimavoq, revisorillu suliffeqarfiutaanni Januar-imi ingerlatseqataasimalluni. Tassani suliffeqarfiit børsimi
nalunaarsorsimasut aningaaserinermillu suliaqartut kukkunersiorneqarnerat
assorsuaq misilittagaqarfigaa.
- Maanna bankip Finanstilsynet aqqutigalugu akuersissutit fit and proper
naammassineqarnissaannut suliaq aallartisartussanngorpaa, nalunaarutigineqarpoq.
Árni Ellefsen pisortaanertut ingerlaannarallassaaq, naatsorsuutigineqarpoq ukioq 2022 pillugu
ukiumoortumik nalunaarut tunniunneqareerpat atorfimminit tunuassasoq.