Bankip ukiup affaanut naatsorsuutai: Kalaallit Nunaanni ineriartortuarneq

Banknordip nunatsinni immikkoortortaqarfiani sullit ukiup affaani siullermi taarsigassarsiarisimasaat 21 procentimik qaffassimasut, aningaaserivimmit ukiup affaanut naatsorsuutit ssaqqummiunneqarnerannut atatillugu ilisimatitsissutigineqarpoq. Aningaaserivimmit erniat qaffariassasut naatsorsuutigineqarpoq, ernialli aningaasartuutaasut suli atorunnaarsinneqarallassanngillat.

Banknordikimit ukiup affaanut naatsorsuutit saqqummiunneqarput, tassani takuneqarsinnaavoq akileraarutit suli peernagit 113 millioner koruuninik sinneqartooruteqartoqarsimasoq, 2021-mi piffissami tassani 192 millioner koruuninik sinneqartooruteqartoqarsimalluni.

Aningaaserivimmit tusagassiorfitsigut nalunaaruteqarlutik allapput, aningaaseriviup Kalaallit Nunaanni immikkoortortaqarfiata sullitaminut taarsigassarsiarititai 21 procentimik qaffariarsimasut.

- Ukiup affaani siullermi ingerlalluarsimavugut, Kalaallit Nunaannilu siuariaqqissimalluta. Sullitatsinnut taarsigassarsisitsinerusimavugut, aammalu uninngasuutaatigut annertusisimallutik. Ineriartorneq tamanna assut naammagisimaarutigaarput, sulilu ingerlatiinnarnissaa sulissutiginiarlugu, Árni Ellefsen, BankNordikimi pisortaaneq oqarpoq.

Pisortaanerup naatsorsuutigaa, ukiup affaani kingullermi taamatut ineriartortoqarnera ingerlaannassasoq, Ukrainemili sorsuttoqarnerata nunarpassuarnilu aningaasat naleerukkiartornerisa malitsigisaannik aningaasaqarnikkut nalorninartorsiortoqalersinnaanera eqqarsaatigineqarpoq.

Erniat aningaasartuutaasut suli atuutsinneqarallassasut

Banknordikimit nalunaarutigineqarpoq, erniarititakkat qaffanneqassasut. Erniat qaffanneqarnerat sullitanut ajortumik kinguneqaannassanngilaq, aammali erniat aningaasartuutaasartut atorunnaarsinneqassallutik, tassani sullitat aningaaserivimmiittuutimik erniaannut akiliuteqartarput:

- Ilimanaateqarluarpoq ECB-p nationalbankillu septembarip 8-anni erniat pillugit ataatsimiinnermik kingorna erniat qaffaqqissagaat. Taamaaliussappata BankNordikip aamma erniat qaffakkumaarpai, taamaasillutalu ilimasaarutigisinnaavarput erniat aningaasartuutaasut atorunnaavissasut, Banknordikimit allapput.

Grønlandsbankenip sapaatip-akunnerani kingullermi nalunaarutigimmagu, erniat aningaasartuutaasut sullitanut inuinnaasunut atorunnaarsinneqassasut, taamatut nalunaaruteqartoqarpoq.

Banknordikip ukiup affaanut naatsorsuutaani pingaarnersiukkat:

  • Akileraarutit sioqqullugit inernerat tassaavoq 113 mio. kr., tassunga sanilliullugu 2021-mi piffimmi tassani inernerat 192 mio. kr.-iuvoq, tassanngalu 90 mio. kr.-it isertitanit ataatsikkut pisuneersuullutik.
  • Appartitsinerit sioqqullugit ingerlatsinerup inernera 96 mio. kr.-iuvoq, 2021-mi piffimmi tassani 85 mio. kr.-iuvoq.
  • Taarsigassarsiarititanik appartitsinernik utertitsineq 31 mio. kr.-iuvoq, tassunga sanilliullugu 2021-mi piffimmi tassani appartitsinerit 23 mio. kr.-iupput.
  • Bankip taarsigassarsisitsinera 2021-mi piffimmi tassani 7,6 mia. kr.-iusoq qaffariarsimavoq 7,7 mia. kr.-ulerluni.
  • Bankip realkreditimik taarsigassarsisitsinera 2021-mi piffimmi tassani 2,5 mia. kr.-usimasoq 2,7 mia. kr.-inut qaffariarsimavoq.
  • Bankip uninngatitai 2021-mi piffimmi tassani 7,7 mia. kr.-iusut 8,9 mia. kr.-inut qaffariarsimapput.
  • Siulersuisut naatsorsuutigaat ilanngaatissat ilanngaatigereerlugit 2022-mi inernerat 160-190 mio. kr.-ip nalaaniissasoq.
    • Pissarsiffik: Banknordik
Powered by Labrador CMS