AWG 2016
Balletsertartup Arctic Winter Gamesimi kulturimut siuttuussaaq
Nuummi 2016-mi Arctic Winter Gameseqarnissaani suliniutigineqartut tamaasa aqutsisoqalerput
Inuussutissarsiutigalugu ballet –imik qitittartuusimasoq Ruth Montgomery-Andersen Arctic Winter Games 2016 –imi kulturimut aqutsisutut atorfinitsinneqarpoq.
Arctic Winter Gamesertoqarnissaani kisimi timersortoqassanngilaq, kulturikkulli aamma pikialaartitsisoqassalluni. Tassani nunanit assigiinngitsuneersut takutitsisassapput. Suliniutini assigiinngitsuni aqutsisoqartareerpoq, soorlu timersortuni.
Misilittagaqarluartoq
Ruth Montgomery-Andersen 1. september 2014 ullup ilaannaa sulilissaaq kingorna 2015 –imiit tamakkiisumik sulilissalluni.
- Ruthip suleqatigilernissaa qilanaaraarput, qilanaaralugu AWG2016 –imut pimoorussinermigut, kulturimut tunngasunik kiisalu nunanut assigiinngitsunut ilisimasaqanermigut tunniusseqataanissaa. Qularutiginngilarput Ruthip anguniassagaa AWG2016 kulturikkut puigunaatsumik misigisaqarfiussasoq, oqarpoq General Manager Maliina Abelsen.
Ruth Montgomery-Andersen balletsernermik inuuniuteqarnikuuvoq maannakkullu qitittarfik Qiajuk Studiomi piginnittuulluni.
Arctic Winter Games 2006-mi isiginnaagassiami 'Ravens Call'-imi aaqqissueqataavoq. 2010-mi aamma isiginnaagassiami 'My Home is the Home of Peace'-mi aaqqissueqataalluni Arctic Winter Gamesertoqarnerani.