Bahamasimi aatsaat taama sakkortutigisumik ulussaarsuartoq

Ulussaarsuaq Dorianimik taaguuserneqarsimasoq Bahamasip avannarpasissuanut ataasinngornerup unnuaani tikiuppoq aseruatitererujussuarlunilu.

Nutaarsiassaqartitsiviit arlallit AP-lu taama allaaserisaqarput.

Dorian, ulussaarsuaq kategori 5-imik taaneqarsimasoq, nunamut tikiummat biilit arlallit assakarput, innaallagiap aqqutai arlallit aserorlutik qeqertallu naalagaaffiusup aqquserngi arlallit qarsunneqarlutik. Ajunaartoqarsimaneranik suli nalunaaruteqartoqanngilaq.

Bahamap naalakkersuisui sapaatip akunnerata naanerani innuttaasunik qimagussuutsitsisimapput.

Bahamap premierministeria, Hubert Minnis, sapaatiummat nalunaaruteqarpoq "qimagussuutsinneqarsimanngitsut aarlerinartorsiorujussuartut, ajunaarnersuaqarnissaalu naatsorsuutigineqartariaqartoq".

Ulussaarsuup nunamut tikiutereernerata kingorna premierministeri nunami nutaarsiassaqartitsivimmut Nassau Guardianimut ulloq "bahamamiunut ajornerpaajusoq alianarnerpaasorlu" oqaatigaa.

Anorip sakkortussusaa 295 km/t-sut uuttuunneqarsimavoq, taamaammat Dorian tassaavoq atlantikup imartaani ulussaarsuarni nunanut tikiussimasuni sakkortunersaat.

Naalagaaffimmi pineqartumi nalunaaqutaq 12.40 missaani ulussaarsuaq Abaco Islandimut tikiuppoq, Dorianilu nalunaaqutaq 14.00 missaani Great Abaco Islandimi Marsh Harbourimut tikiulluni.

- Ajorluinnarpoq. Pigisat aqquserngillu aseruatiterujussuarput. Qujanartumilli maannamut inunnik ajunaarsimasunik suli kalerrinneqanngilagut, qeqertami naalagaaffiusumi takornariaqarnermut silaannakkullu angallannermut ministeriaqarfimmi generaldirektøri, Joy Jibrilu, ataasinngornermi unnuaani taama oqarpoq.

Videoliani Bahamap naalakkersuisuinit saqqummiunneqarsimasuni takuneqarsinnaavoq ulussaarsuup aqqutigisimasaani aseruatitertoqangaatsiarsimasoq.

Tassani takuneqarsinnaapput aqquserngit qarsutsineqarsimasut, orpiit uppikaasimasut najugaqarfiillu qarsunneqarsimallutik anorersuartut. Sumiiffinni arlalinni biilit ulivillugit qarsutsisoqarsimavoq.

Amerikap kujasissortaani naalagaaffiit arlallit aamma qimagussuutsitsillutik aallartereerput. Dorian amerikap kujataata kangisissua sinerlugu naalagaaffiit ilai aqqusaassagai naatsorsuutigineqarpoq.

Ulussaarsuarlu nunamut tikiuteqqinngikkaluarpalluunniit, naalagaaffiup ilai, tassa Florida, Georgia, South Carolina aamma North Carolina anorersuarujussuarmit eqqorneqartussaassapput.

South Carolinami inuit 830.000-it ataasinngornermi nunap pineqartup nalunaaqutaa malillugu ullaap tungaani qimagussuutitinneqassasoq aalajangertoqareerpoq.