Bagmandspolitiit KNI-mi kusanaatsuliortoqarsimanerani peqataatinneqalersinnaasut
Kalaallit Nunaata Politiivini chefpolitiinspektør Jens Harlev ilisimatitsivoq politiit sulineranni nalinginnaalluinnartoq politiit immikkut ilisimasallit qallunaat nunaanneersut ikiuuttarnerat.
Piaaraluni allatut naatsorsueriaaseqarneq pillugu 5. augustili unnerluuteqartoqarpoq. Tassami peqquserluttoqarsimanera pillugu Sisimiuni politiinut suliamik tunniussisoqarsimammat, suliarlu Kalaallit Nunaata Politiivinit misissorneqarluni. Suliami eqqarsaatersuutigineqarpoq Aningaasaqarnikkut Nunarsuarlu tamakkerlugu Peqquserluttuliortoqarsimatillugu (Søik) Naalagaaffiup Eqqartuussisuunera peqataatinneqalissanersoq. Søik ulluinnarni taaneqartarpoq danskit bagmandspolitiivi.
- Suliami pisariaqartutut nalilerneqassappat aalajangerneqassaaq Søik ikiuutissanersoq, Kalaallit Nunaata Politiivini chefpolitiinspektør Jørgen Harlev ilisimatitsivoq.
Taassuma erseqqissarpaa paasiniaanermi pisariaqartutut suli isigineqanngitsoq, aningaasaqarnikkut peqquserluttoqarsimaneranik paasiniaasartunik ikiorteqalernissaq.
- Suliaq maannakkumut Nuummiit aallaaveqartumik kisimi paasiniaaffigineqarpoq, Søik-illi ikiortiserineqaratarnissaanut tunngatillugu siumoortumik naaggaareersinnaanngilanga, Jørgen Harlev ilisimatitsivoq.
Ippinnartortaqanngilaq
- Søik-imut ikiortissarsiorluta qinnuteqassagutta tamanna ippinnartortaqanngilaq. Assersuutigalugu toqutsisoqarsimatillugu suliani ajornakusoortuni danskit politiivini immikkut ilisimasallit ikiortiserisarpagut, maani sulisugut killeqarsinnaasarmata, chefpolitiinspektør nassuiaavoq.
Politiit paasiniaanerata saniatigut KNI-p siulersuisui sumulluunniit attuumassuteqanngitsumik misissuisitsilerput. Naatsorsuuserivik PwC qulaajaassaaq, Deloittemiillu misissuinerunissaa naatsorsuutigineqarluni. Deloitte ukiup affaanoortumi nalunaarusiami "misissuinertut" taallugu suliaqarsimavoq. Siulersuisuni siulittaasoq Lars Borris Pedersen siusinnerusukkut nassuiaateqarpoq "misissuinissat" arlallit ingerlanneqassasut, KNI A/S-ip nalilinnik naatsorsuutteqarnerata 50 milliuunit koruuninik appartinneqarnera pissutigalugu.
Søik-imi Naalagaaffiup Eqqartuussisuunera immikkut ittumik suliaqartuuvoq. Aningaasaqarnikkut pinerluttoqarsimatillugu suliat paasiniaavigisarpai. Nittartagaanni allassimavoq suliat uku ingerlanneqartartut:
- Suliat annertuut,
- ataqatigiissaakkamik pinerluttoqartillugu,
- suliaqaqatigiilluni immikkut ittumik ingerlatsisoqartillugu imaluunniit
- suliaq immikkut ittumik pisariaqartutut nalilerneqarpat.