Bagger: Siriusip Erfalusutsinnik atuiniarnera iluarinarpoq
Ane lone Baggerip neriuutigaa kalaallit inusuttut alapernaarsuisartunut Siriusikkunnut ilaalerumaartut
Danmarkimi illersornissamut ministerip Trine Bramsenip (Soc) oqaatigisimavaa, Erfalasorput alapernaarsuisartut Siriusikkut qamutaanni Dannebrogip saniani siunissami takuneqarsinnaanngussassoq.
Pilersaarutitigineqartut Dansk Folkepartiimit aamma De Konservativenit isornartorsiorneqangaatsiarput. Ilinniartitaanermut, Kultureqarnermut, Ilageeqarnermut Nunanullu allanut tunngasutigut Naalakkersuisoq isumassarsiamut tapersersuivoq.
- Iluarinarpoq Danskit naalakkersuisuisa Sirius patruljemi tunup avannaarsuani qimussimik angalasarnerminni erfalasutta atornissaa siunertarimmassuk. Pissusissamisoorpormi erfalasorput nunatsinni atorneqassasoq, Ane Lone Bagger (S) tusagassiorfinnut nalunaaruteqarnermi oqarpoq.
Taanna isumaqarpoq, danskit naalakkersuisuisa naligiimmik ataqqeqatigiillunilu peqatigiinnissamik anguniagaqarnerannut tamanna takussutissaasoq.
- Siunertaat pimoorunneqassappat erfalasorpullu atorneqartalissappat takutitsissaaq Sirius patrulje Kalaallit Nunaanni inuaqatigiinnut akuusoq. Qilanaaraara inuusuttortagut erfalasorput atorlugu Sirius patruljemi peqataasalernissaat.