Bagger: Issittoq pillugu periusissiap oqallisaanerata Kalaallit Nunaanni aallartinneqarnissaa pingaaruteqarpoq

Kunngeqarfiup issittoq pillugu periusissiaa Kalaallit Nunaanni innuttaasunut, kunngeqarfiup issittortaani inuusunut naapertuuttariaqarpoq, nunanut allanut tunngasutigut naalakkersuisoq isumaqarpoq

Kunngeqarfiup issittoq pillugu periusissiaa 2011-meersuuvoq ukiorlu manna atorunnaartussaalluni. Taamaammat nutaamik sanasoqassaaq, tamannalumi maanna aallartereerneqarsinnaavoq, Nunanut allanut tunngasutigut Naalakkersuisoq Ane Lone Bagger (S) oqarpoq.

- Periusissiaq maanna atuuttoq pisoqarlivoq, tassa uatsinnut kunngeqarfiup issittortaani inuusunut naapertuutinnginnami, Ane Lone Bagger Sermitsiaq.AG-mut erseqqissaavoq.

- Issittoq nunanit tamalaanit soqutigineqarneruleriartortoq takusinnaavarput, tamannalu Kalaallit Nunaanni innuttaasunut toqqaannartumik sunniuteqartarpoq. Periusissiami nutaami tamanna eqqarsaatigineqartariaqarpoq.

- Kalaallit Nunaat Kunngeqarfimmi issittormiuuvoq, issittorlu pillugu periusissiami ullutsinnut naleqqussarsimasumi tamanna takuneqarsinnaasariaqarpoq.

Ane Lone Baggerip (S) nassuiaatigaa sapinngisamik amerlanerpaat peqataatikkusullugit, tassa Kalaallit Nunaanni innuttaasut taakkuummata Issittumi allanngortoqarneranik soqutiginnittullu amerliartornerannit pitsaasumik ajortumillu sunnerneqartartut.

- Soqutiginnittunit assigiinngitsunit immersorneqarnissarput maanna sulissutigaarput. Ilisimatuut, inuussutissarsiortut, NGO-t kommunillu matumani pineqarput.

Ilulissani ataatsimiinneq aallarniutaassasoq

Martsip qaammataata naanerani naalagaaffeqatigiinni pingasuusuni inatsisartut Ilulissani ataatsimeersuassapput. Ataatsimeersuarneq isittoq pillugu periusissiap politikkikkut oqallissutaanisaanut aallarniutaassaaq.

- Naalakkersuisunut pingaaruteqarpoq, issittoq pillugu periusissiap oqallisaanerata Issitumi, tassa Kalaallit Nunaanni aallartinneqarnissaa, Ane Lone Bagger (S) oqarpoq.

Aamma pilersaarutaavoq folketingip tusarniaaffigineqarnissaa, Ilulissanili oqallinnerup suliamut aallarniutaanissaa qulakkeerniarlugu tusarniaanissaq piffissamut allamut nuunneqarsimavoq.

- Ataatsimiinnissatsinnut qilanaaqaanga.

Isummersuutinik maannakkorpiaq pissarsiniartoqarmat Ane Lone Baggerip nammineq isummani malillugu suut salliutinneqartariaqarnersut oqaatigissallugit tunuarsimaarfigaa.

- Oqaatigisinnaavarali, isumaqarama Kunngeqarfik Issittumi ilisimatusarnermik pingaarnerutitsilertariaqartoq.

Powered by Labrador CMS