Bagger: Issittoq pillugu periusissiami kalaallit soqutigisaat pingaartnneqassapput
Ane Lone Baggerip nunanullu allanut ministerip Jeppe Kofodip nunanut allanut isumannaallisaanermullu tunngasutigut suleqatigiinnerup qanoq nukittorsarneqarsinnaanera oqaluuserisimavaat
Kunngearfiup Issittumut tunngatillugu Periusissiaa 2020-mi atorunnaassaaq nutaamillu taarserneqassalluni.
Periusissiami nutaami kalaallit soqutigisaat pingaartinneqarnerussapput, Nunanut Allanut Naalakkersuisoq Ane Lone Bagger (S) nunanut allanut ministerimik Jeppe Kofodimik (Soc) oqaloqateqareerluni erseqqissaavoq.
- Naqissuserusuppara uagut tassaagatta Naalagaaffeqatigiinnermi Issittumi najugaqartuusut. Tassaavugut uagut Issittumi allannguutinik kingunerisaanillu maluginnittut. Taamaattumik Naalakkersuisunit Kunngeqarfiup Issittumut periusissiaanut piginneqataasutut misigisimanissarput Kalaallit Nunaatalu soqutigisaasa pingaartinneqarnissaat Naalakkersuisunut aalajangiisuuvoq, tusagassiorfinnut nalunaaruteqarnermini oqarpoq.
Suleqatigiissutaasinnaasut oqaluuserigaat
Nunanut allanut isumannaallisaanermullu politikki pineqartillugu Kalaallit Nunaata qanoq peqataatinneqarnerusinnaanera oqaluuserineqarnerusimavoq. Suli tigussaasumik isumaqatigiissuteqartoqanngilaq, ministereqatigiilli taakku marluusut suleqatigiinnerup nukittorsakkap qanoq ingerlanneqarsinnaaneranut isumassarsiat arlallit oqaloqatigiissutigilluarsimavaat.
- Ullumi pitsaasumik ingerlasumi oqaloqatigeeqqaarnermi danskit naalakkersuisuisa anguniagaat eqqartorneqarput tassaasut qanoq illilluni Naalagaaffeqatigiinni naligiimmik, pitsaasumik suleqatigiinnerullu nukittorsarnissaanik piviusunngortitsinissaq qulakkeerneqassanersoq. Nukittuumik ataatsimoorussaqarneq illugiinnik ammaffigeqatigiinnermik ataqqeqatigiinnermillu pilersitsisarpoq. Tamanna eqqarsaatinniittorujussuuvoq, tassami nunanut allanut sullissineq Naalagaaffeqatigiinnut tamanut atuuttuuvoq, Jeppe Kofod tusagassiorfinnut nalunaaruteqarnermini oqarpoq.
- Kalaallit savalimmiullu nunanut allanut pingaarnersiugaat nunanut allanut sullissivimmi annertuumik ilisimasaqarfiginissaat qulakkeertariaqarparput. Piffissami qaninnerpaami isumassarsiat suliniutinut aalajangersimasunut ullumikkut eqqartukkavut qanoq piviusunngortinneqarsinnaanersut qimerluuataassavagut. Savalimmiuni suleqatiga Jenis av Rana tamatuminnga aamma eqqartueqatiginissaa qilanaareqaara, qanittumi Tórshavnimut tikeraarnissanni.
Aamma Ane Lone Baggerip nunanut allanut sillimaniarnermullu politikkeqarnermi naligiinnerusumik suleqatigiittoqarnissaa qilanaarivaa.
- Aallaqqaammut nuannaarutigeqaara nunanut allanut ministerip toqqarneqarnerminit piffissaq sivikitsoq qaangiuttorlu Kalaallit Nunaannut tikeraarnera, tassuunami takutinneqarmat danskit naalakkersuisuinit Kalaallit Nunaat soqutigineqarluartoq. Nuup Københavnillu akornanni qaninnerusumik naligiinnerusumillu qanimut suleqatigiinnissamut isumalluaatissaqarpunga. Tassani timitaliinissaq pingaaruteqarpoq suleqatigiinnerup nukittorsarnissaata qanoq isikkoqarnissaanik sulinerup aallartinnissaa.