Baggerimit allagaritittuusaarneqartut Kalaallit Nunaata Danmarkillu akornanni avissaartuutsitsissapput

Allakkat eqqunngitsut Nunanut Allanut Naalakkersuisumit Ane Lone Baggerimit (S) allagaritittuusaarneqartut malillugit Kalaallit Nunaat USA-lu peqatigiillutik Kalaallit Nunaata namminiilivinnissaa pillugu sulissuteqarput. Politiken taamatut allappoq.

Naalakkersuisut allagaqaraangamik pappialaq atortagaat atorlugu allakkat allagaapput Ane Lone Baggerimillu atsiorneqarsimarpasillutik. Allakkat senator Tom Cottonimut, Donald Trumpip Kalaallit Nunaannik pisiaqarniarlui pilersaarutaani qitiusutut inissisimasimasumut allagaapput.

Allakkat eqqunngitsut aallarnerlugit niuernikkut attaveqaqatigiinnerunissaq, peqatigiilluni inuttut niuernikkullu suliniuteqarnissat kiisalu isumannaallisaanikkut suleqatigiinnerunissaq pillugit allattoqarsimavoq.

- Ilatsilluartumik ingerlatsisoqarnissaanut (suleqatigiissutaasussanik) apeqqutaalluinnassaaq USA-p Kalaallillu Nunaata akornanni peqatigiilernerup qanoq annertutiginera, allakkami taamatut allassimasoqarpoq.

Namminiilivinnissaq pillugu innuttaasut piaartumik taasitinneqassasut

Allakkami qitiulluinnartutut oqaatigineqarpoq.

- Naalakkersuisutta inatsisitigut politikkikkullu aporfiusinnaasut piiassavaat, piaarnerpaamillu Kalaallit Nunaata Danmarkimit avissaarnissaa pillugu innuttaasut taasitinneqassallutik.

Aamma allakkami takuneqarsinnaavoq, USA innuttaasut taasitinneqarneranni aningaasartuutinik akiliuteqarnissamut akuersisisimasoq kiisalu Kalaallit Nunaat naalagaaffittut kiffaanngissuseqassasoq. Allakkat ataatsimut isigalugit USA-mut arllaatigut atassuteqarnissaq pineqarpoq.

Politikken naapertorlugu allakkat salloqittaataasut inuit attaveqaqatigiittarfiitigut Reddit-igut aamma Indybay-tigut siammarterneqarput.

Forsvarsakademimi major aamma sakkutooqarnermik misissueqqissaartartoq Steen Kjærgaard isumaqarpoq, allakkat peqqarniitsuusut. Taassuma oqaatigaa, ‘ilimanarnerusoq’ Rusland allakkanik siammarterisimassasoq.

- Imaassinnaavoq toqqaannartumik naalagaaffitsigoortumik iliuuseqartoqarsimanngisoq, pissaanillilli Rusland sinnerlugu assigiinngitsorpassuartigut iliuuseqarsinnaapput, taanna Politikkenimut nangilluni oqarpoq.

- Danmarkimik USA-millu avissaartuutsitsiniaaneq

Taanna isumaqarpoq, Naalagaaffeqatigiit avissaartuutsinneqarnissaannik, pingaartumilli Danmarkip USA-llu akornanni avissaartuuttoqalernissaanik siunertaqarluni eqqunngitsunik allattoqarsimasoq.

- Danmark USA-p iliisa qaninnerit ilagaat, taamaammat Danmarkip USA-llu akornanni avissaartuutsitsilerneq suliaassaaq imaannaanngitsoq. Issittoq matumani atornerlunneqarpoq, tassa Nunat killiit iluini Nato-llu iluani avissaartuuttoqarnerulernissaanik anguniagaqarnermi, taanna Politikenimut oqarpoq.

Nunanut Allanut Naalakkersuisoqarfimmit Politikenimut uppernarsarneqarpoq allakkat ilisimaneqartut aamma salloqittaataasut.