Bagger: Ilinniarfiit aallartinneqassappata inatsisitigut unioqqutitsisoqassaaq
Niuernermik Ilinniarfimmi ilinniarfiit marluk taamaatiinnarneqartut ukioq manna ilinniarfissatut neqeroorutigineqassanngillat. Taamaasilluni atualertussaagaluit aqqaneq marluk ukioq manna atualerfissaraluaminni atualissanngillat
- Nuummi NI ilinniarfiit akuersissummik tunineqarsimanatillu aningaasartalerneqarnissaannik isumannaarisoqannginnerani neqeroorutigisimavai. Ilinniarfiit suli akuerisaanngimmata aningaasartalerneqarsimanngimmatalu aallartinneqarsinnaanngillat - aallartinneqassappata inatsisinik unioqqutitsinerussaaq.
Ilinniartitaanermut naalakkersuisoq Ane Lone Bagger Sermitsiaq.AG-mut naqissusiivoq. Nuummi Niuermermik Ilinniarfimmi ilinniarfiit marluk aallartittussaagaluit taamaatiinnarneqartut uani eqqartorneqarput.
Ilinniarfiit aallartinneqarnissaat IA-mit Sofia Geislerimit aallartinneqarnissaat innersuunneqaraluarpoq, innersuulli itigartinneqarpoq.
Akuersissuteqanngitsumik neqeroortitsineq
Ilinniarfinnik aallartitsiniarnermi Inuussutissarsiornermut ilinniakkanut inatsimmi najoqqutassat, piumasaqaatit, pilersaarutit, ilinniakkap aaqqissuussaanerat Naalakkersuisunut akuerisassanngorlugu nassiunneqartartussaasut Ane Lone Baggerimit nassuiaassutigineqarput.
Ilinniarfiit eqqartorneqartut marluk akuersissutigineqannginnerini neqeroortitsisoqarsimasoq ilisimatitsissutigaa.
Missingersuutit kingusinaarluni nassiunneqartut
Aningaasanut inatsimmut 2019-mut sulinermi aningaasat ilinniarfiit taakku marlunnut missingersuutaasut nassiunneqarsimasussaagaluartut aamma naalakkersuisup ilisimatitsissutigaa, missingersuutit Inatsisartut ukiaanerani ataatsimiinneranni 2018-mi eqqartugassatut ilanngussassatut tassuuna ilaasimasussaagaluarlutik.
- NI Nuuk missingersuutinik nassiussivoq aatsaat aasap naanerani 2019-mi. Aningaasanut inatsit 2019-moortoq Inatsisartunit akuerineqarpoq 2018-ip ukiaanerani, Ane Lone Bagger oqarpoq.
- Ilinniarfiit aallartinneqarnissaat anguniarlugu ilassutitut aningaasaliissutissanik aningaasaqarnermut ataatsimiititaliamut qinnuteqartoqassava?
- Ilisimatitsissutigisinnaavara immikkut aningaasartuutaasussat, aningaasanut inatsisip akuerineqarnerani naatsorsuutigineqarsinnaasimanngitsut, Aningaasaqarnermut ataatsimiititaliap Inatsisartut sinnerlugit akuerisarmagit, naalakkersuisoqarfiulli nalilerpaa suliami uani taama iliortoqanngitsoq, Ane Lone Bagger akivoq.
Taamatut pisoqaqqissanngilaq
Ilinniarnissamut akuerisaasimagaluartut aqqaneq marluk qanoq ingerlariaqqissinnaanersut maanna siunnersorneqassasut, Ane Lone Bagger ilisimatitsivoq.
- Suliassap tulleraa taamatut pisoqaqqinnginnissaa qanoq isilluni pinngitsoorneqarsinnaanersoq. Kultureqarnermut, Ilinniartitaanermut aamma Ilageeqarnermut Naalakkersuisoqarfiup suliap qanoq ingerlasimanera misissussavaa. Suna peqqutaalluni taamatut pisoqarsimanersoq paasineqarpat kinguneqartitsisoqassanersoq imaluunniit qanoq iliuuseqartoqassanersoq paasinarsissaaq, ilinniartitaanermut naalakkersuisoq oqarpoq.
- Pisoq ilinniartitaanermi naalakkersuisutut malinnaavigeqqissaarpara, pisullu ajuusaarutigalugit. Taamatut pisoqarsimasussaanngikkaluarpoq, Ane Lone Bagger oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...