Island Games
Badminton: Ilimagisat kvartfinalimut killiinnarput
Island Gamesimi Jens-Frederik Nielsen aamma Bror Madsen kvartfinalimi ajorsarput. Assit takukkit
Sermitsiaq.AG-p pingasunngormat allaaserisaatut badminton-ertartut Jens-Frederik Nielsenip aamma Bror Madsenip Island Gamesimi, Jerseymi ingerlanneqartumi, Kalaallit Nunaat medalje-natsissavaat.
Taakkumi angutit iligiiaarneranni aqagu tallimanngornermi finalissapput.
Pingasunngornermi badminton-imi angutit ataasiakkaarlutik arnallu iligiiaarlutik unammipput.
Iligiiaarluni unamminermi Aviaaja Geisler Sara Lindskov Jacobsenilu unamminerminni siullermi Jerseymeersunut sæt-tit pingasut atorlugit ajorsarput. Sæt-imi siullermi ajugaagaluarput, ajoraluartumilli tuliini ajorsarlutik. Inerneraat 22-20, 19-21 aamma 13-21.
Aamma angutit ingerlalluanngillat
Angutit ataaiakkaarlutik unammipput. Nikki Nathansen unamminermini siullermi ajorsarpoq. Karl Jakob Thomassen ottendedelsfinalimut annguppoq.
Kalaallit angutit marluk, unammiuaarnermi angusarissaartussatut ilimagineqrasimasut Jens-Frederik Nielsen aamma Bror Madsen unamminerminni siullermi unammilluaqaat. Inersuaq badminton-erfik kiagaaq silaannalullunilu.
Kvartfinalimi unamminerminni taakkua marlu semifinalimut anngutingajakkaluarput. Jens-Frederik Nielsen savalimmiormiumut sæt-it pingasut atorlugit ajorsarpoq. Inerneralugit 15-21, 21-18 aamma 16-21.
Bror Madsen aamma sæt-ini pingasuni unammivoq. Malunnarpoq qasoqqasoq, naggatissaali tikillugu tamaviaarpoq. Menorca-meersumut 16-21-mik, 21-14-imik aamma 20-22-mik ajorsarpoq.
Ullumi sisamanngornermi arnat angutillu iligiiaarlutik unammissapput. Tallimanngornermi finalit ingerlanneqassapput.
Assit ataani takukkit