Bachelorit 25-it aamma kandidatit aqqanillit Ilisimatusarfimmi ullumi allagartartaarput
Ilisimatusarfimmi ullumi tallimanngorneq 24. februar allagartartaartitsinermi, bachelorinngortut 25-it aamma kandidatinngortut aqqanillit allagartartaarput. Assit allaaserisap qulaani takukkit.
Bachelorinngortut aamma kandidatinngortut katillugit 36-iusut, Ilisimatusarfimmi tallimanngornerup ullaap tungaani allagartartaartinneqarput.
Bachelorit 25-it aamma kandidatit aqqanillit allagartartaartinneqarput.
Bachelorinngortut:
- Inuussutissarsiornermi aningaasaqarnermut ilisimatusarneq: bachelori 1
- Tusagassiortoq: bachelorit 3
- Inatsisilerineq: bachelorit 6
- Inuiaat Kulturiat Oqaluttuarisaanerallu: bachelorit 3
- Ilinniartitsisoq: bachelori 1
- Nutserisoq Oqalutsilu: bachelori 1
- Inuiaqatigiilerineq: bachelori 1
- Isumaginninnermut Siunnersorti: bachelorit 8
- Oqaasilerineq, Atuakkialerineq Tusagassiuutilerinerlu: bachelori 1
Kandidatinngortut:
- Inuiaat Kulturiat Oqaluttuarisaanerallu: kandidatit 4
- Inuiaqatigiilerineq: kandidatit 3
- Oqaasilerineq, Atuakkialerineq Tusagassiuutilerinerlu: kandidatit 4
Dorthe Berthelsen Kristensen, isumaginninnermut siunnersortitut bachelorinngortoq, bacheloritut ilinniakkami misilitsinnerni angusarissaarnerpaasutut KNI-mit akissarsitinneqarpoq.
Liv Molich, Oqaasilerineq, Atuakkialerineq Tusagassiuutilerinermilu kandidatinngortoq angusarissaarnerpaatut Sulisitsisunit akissarsitinneqarpoq. Taanna bacheloritut naammassigami angusarissaarnerpaatut aamma KNI-mit akissarsitinneqarsimavoq.
- Ullumikkut ulloq nalliuttorsiorfiuvoq. Ilinniakkassinni anguniarsimasarsi kiisami anguarsi. Ilissinnut, ilisarisimasassinnut nunarpullu pillugu ilungersorsimavusi. Ilungersornersi anguniagaqarnersilu maanna imminut akilerpoq. Ilisimatusarfimmi tulluusimaarutigaarput bachelorinngortut kandidatinngortullu taama amerlatigisut ilinniakkamik naammassinninnerannut uppernarsaammik tunisinnaagatsigit, Ilisimatusarfimmi rektori, Gitte Adler Reimer allagartartaartitsinermi oqarpoq.