B-67 utoqqasaani pissartanngorpoq
Utoqqasaat 45-leereersimasut Nunatsinni futsalimi pissartanngorniummata, B-67 Nuummeersoq Nagdlunguamut Ilulissanersumut sapaatiummat ajugaangami Nunatsinni pissartanngorpoq.
Sapaatip akunnerata naanerani Nuup Timersortarfiani arsaattoqarpoq. Utoqqasaat 45-leereersimasut Nunatsinni pissartanngorniupput, normu 1-inngorniummermi normu 3-nngorniunnermilu arsaattartut illoqarfiit pingaarnersaanneersut tamarmik ajugaapput.
Ajugaaniutivinnermi Nagdlunnguaq B-67-ilu unammivissoramik arsaannerup immikkoortuani siullermi tamarmik isertitaqanngillat.
Arsaannerup immikkoortuata aappaani B-67 sekundit qulit ingerlariiginnartut isertitsigamik ataaseraarput.
Ilulissaneersut fairplay-mik nersornaaserneqartut
2-0-mik siuartoqareersoq angutit Ilulissaneersut unammilluarsimaqisut, unammineq naalluinnaqqinnaalersoq straffertinneqarput.
Straffimilli isertitseriarneq iluatsinneqanngilaq, B-67-imeersullu 2-0-mik ajugaangamim, nunatsinni futsalimi utoqqasaat 45-leereersimasut pissartanngorniunneranni pissartanngorlutik.
Ilulissaneersut unammersuarnermi susaaratik angerlarput, ukioq-mannami unammersuarnermi sisamariaannarlutik frisparkertitsisimasutut Failplay-mik nersornaaserneqarput.
Bronzinnanniunneq
NÛK normu 3-nngorniunnermi ajugaavoq, taakku K-1933-mut Qaqortumeersumut unammisimapput.
NÛK minutsit arfineq-marluk ingerlariiginnartut siuarput, siuarmatalu minutsip affaa qaangiutiinnartoq kujataaneersut isertitsimmata unammineq pissanganarsisimavoq, sivitsunngitsorli NÛK isertitseqqilluni 2-1-imik siuarpoq. Unamminersup immikkoortuata aappaani tamarmik ataatsimik isertitsipput, unamminerlu naammat NÛK 3-2-mik ajugaalluni.
Ajugaaniutivinnik aallartitsinnagu inuiattut erinarsuut atorneqartot pillugu video uani takuuk: